المساعد الشخصي الرقمي

مشاهدة النسخة كاملة : من فضلك : " أغـلـق البـــال "


صالح العبدالكريم
08-17-2009, 09:59 AM
هنا تكون الأحاديث عفوية ، الشعر متناثر ، الذكريات بحجم الأرض
وما بقي من الملامح ، وما ذهب منها ..!

صالح العبدالكريم
08-17-2009, 10:00 AM
ما علّموك بغيبتك وش حصلّي
..................... خلقت لك عذرين تستاهل رضاي
الأول إني قبل أضيّع محلّي
..................... أذكرك واقف ما تحاليت ممشاي
والثاني إنك لو تغافلت كلّي
..................... يمديك تطعن أكثري وتوجع أقصاي
والحين دامي قلت لك ، عاد قلّي
...................... ما أوجعتك الغيبة وهزّك الناي
والدمع ما بلل مشاعرك ياللي :
..................... بينك وبين حدود الاحلام رجواي
خليتني واقف على أطراف ظلّي
...................... متملل من الناس وأعدد خطاي
تدري وش اللي في غيابك يسلّي
.................... لا ضقت طيفك .. زارني وبلل شفـاي
تعااال .. كافي يا حبيبي تغلّي
.................... عندي كلام و ..خايف يموت جواي

صالح العبدالكريم
08-17-2009, 10:04 AM
يا جميل اللحظ قُلّي
إن أطلت العُمر يوماً
إن سكبت الغيم حُلماً في يدي
هل اُعيد الذكريات
أم يرُدُ صداي ظلّي
أنت
ها أنت تُـعيد الأمنيات
تزرع الأمن بصدر الأغنيات
وتُحيل الأسود منّي للبياض
وتُغنّي للرياض
ها أنا ذا جُئت والأقدار جاءت
بالمُنى من بعد إشفاقي وذُلي ..!

صالح العبدالكريم
08-29-2009, 04:55 PM
ما غيرك احد ٍ حرّك الوصل فيني
................ يا الغالي اللي لجله البارحه ضقت !

جرّبت غيرك وأدري إنك تبيني
............... غلطه وراح أدفع ثمنها مع الوقت !

عاجز .. خلقت من النوايا حنيني
............... تايه .. خذتني غفلتي لكن إشتقت :

لأيامك اللي لو أبحسب سنيني
.............. ما عادلت ضحكت عيونك إذا فقت !!

ليتك قبل لا أنتهي تبتديني
............... وليتي قبل لا أحترق بك ترفّقت

عشان أحس بلذتك وإنت فيني
............. وأشوفك أقرب من دموعي إلى أطرقت

وإلاّ بعيد الناس لوّه يجيني
............. والللللله ما يفرق عن الناس لا ضقت !!

صالح العبدالكريم
09-13-2009, 09:27 PM
إهداء لك ِ أبنتي فقد تقرأيها هنا بعد عُمر



http://www.badr-3.com/up/uploads/98a0d994c3.gif





يا ( لاما ) والصغار اليا بدو يتحسسون الناس
.......................... نبت بخدودهم حب الكلام وعفرتو بدري

وانا اشوفك عطيتي الريح هيبه والخيول إحساس
......................... ما كن الأرض من تحتك بعيده وهاجسك يدري

تلاغيك السماء قبل الغيوم وينطنخ لك راس
......................... وأشوف برفعة حجاجك عزيمة شمّر وقدري

ألا يا بعد من لم الكلام الواجد بكرّاس
......................... وألا يا بعد من فت الضلوع المبطيه حدري

تعالي إنزلي ودّي أضمّك والسنين يباس
......................... مثل ما الخيل تشتاقك وربي إشتاقلك صدري !!

صالح العبدالكريم
09-14-2009, 07:31 PM
كرمالك
كنت
ابخبي !؟




.......... ما ابي تزعل علي !

وين اريّح بالي وين
وانت لك مليون عين
وما تشوف .!!

إن قلبي لو سلى عنّك :
لقاك ..!

وإن عمري
لو تبي
منّه :
فداك

وش وراك ؟
لاقي ٍ واحد يحبّك
لو
تغيب
شوي
عنّه
فزّت ضلوعه و جاك ..!!


انت نفسك

لو تبي ترجع لنفسك

راح تلقاني .. مكاني

واللي يعشق حتى لو قالو : يعاني

يكفي انّه ما تعب من أي شي

والهوى لو تختلي فيه الأماني

انجبو إحساس حي ..!؟


ظنّك انسى

لو نفظني البرد

قولك : قبل لا تغفى .. تدف


أو ابنسى

حيّك المليان ورد

وكل مكانٍ حظـّنا منه .. الصدف




وضحكت جنون السوالف

ورفعت حجاج الزعل

كم حلفت .. وإنت حالف

من على الثاني سأل ..!


والسفر :

وحكاية الشوق بيدينا


والبحر :

والطاوله اللي تحترينا


والشوارع :

كيف اذا مرّيت هادي

ودّك امرّه عَجل ..!!



يا قريب

وانا احسّك تاخذ النبض وتروح

وإن تمغـّط صبحنا ترجع تجيبه ..!


يا بعيد

وليلنا اللي كل مواعيده وضوح

صار يصافحني ونظراته غريبه


وانا اعرفه زين لامنّه تضايق

يبقى ساكت / ما يتكلم

لو سمع نبض يتألم

يمكن عشانه ما تعوّدني لحالي

لنّه يفرح لا جمع غالي بغالي

كيف وهو شايفني

وحمولي كثيره

والوله لاعب بحالي ..!؟

صالح العبدالكريم
09-21-2009, 01:14 AM
يا عيد لو لك في جناحيني ضماد
................ قدرت أطير لصاحبي في محلّه

هذاك والله ما تساويه الأشهاد
...............اليا نشف ريقي من الوقت بلّه

يا عيد له وحشه مع الوقت تزداد
............... كانك على ما قيل تاصله قلّه

كل عيد أحسّه غير عن كل الأعياد
.............. أفدا عيونه ، ونبض قلبه ، وكلّه !!

صالح العبدالكريم
10-02-2009, 11:42 PM
http://www.dubaieyes.net/gallery/data/media/60/hx-3-2-9.jpg




بكيت فجأه والبكا فجأه من افضع ما يكون
.......... هو عكس حالة لا عصرت عيونك وشحّت بماه

هذاني جيتك يا يبه وديارك وربعك سكون
........... أبطيت وأدري إنك تعذر الغايب وتدمح خطاه

ودّي أسولف وأدري إنّي لو بسولف تسمعون
............. وأدري بأن الله كتب لقبوركم موت وحياه

شفني على قد التعب ويباس صدري والمتون
......... والضيقه اللي تقتفي هالسور وتضيّق مداه

والجمعه اللي غرّقتني بالمطر دمع وعيون
........ واللحظه اللي صرت اناظر لله بعالي سماه

واقول : يا ربي وأنا عبدك وتتعبني الظنون
....... عشرين عام وهالقبر يحفظ سواليفي معاه

حفّظني أشكال الحصى وقدر الشجر عند الغصون
............ وحفّظته أثني ركبتيني عنده وأبكي غلاه

صالح العبدالكريم
10-04-2009, 06:43 PM
احبك لو تعبت من الحنين ولمّة الأصحاب
........... احبّك لو يغول الوقت حلقي ويجرح سكوتي

انا مالي بعد عينك عيون تلاغي الأهداب
............ وانا مالي بعد قلبك قلوب تحس في موتي

ورب البيت اعرف إن السوالف حفنتين تراب
............. ولا باقي من أنفاسي نفس وآزرّره كوتي

وانا لو بفهق عظامي عن البرد وأحط أسباب
............. أبتراجع عن أحلامي القديمه وأنتظر قوتي

عسى ما اطيح في كبد الليالي والنوايا باب
.............. وراه تخبّي الدنيا وجيـه يميّزه صوتي ..!

صالح العبدالكريم
10-04-2009, 06:47 PM
" ما تشوف "
ضلوع صدري .. ثلّجت
وهي تحتريك ..!

" ما تشوف "
الناس ماتت في عيوني
واختفت !؟

" ما تشوف "
الكلمه لامن جيت ابنطقها
وقفت !؟

انت اكبر مشكله عندك حبيبي
( ما تشوف )
................... الله يهديك ..!!

صالح العبدالكريم
10-04-2009, 06:50 PM
يا متختخه .. وحجاجك الردّاح لا منّه تقوّس
.............. يترك سؤال بداخلي .. معقوله زيّنها الكبر

ما كنت اظن القلب ينضج .. انا خابره متموّس
............. وما كنت اظنّ اسفنجتين الصدر محطوطه بقبر

بس احذري طفل البدو لا طاح بالنعمه يحوّس
.............. ويكره كثير إن الأماني الجيّده .. تُشبر شبر

توّي عرفت ان النظر لو ما انتبهنا له يسوّس
.............. وإن الحنين اللي عقوقه يقتلك فجأه يـبر

وإن القمر لو ما احتياجه للسما ولليل نوّس
............. والشمس تحرق نفسها والأرض ما طقّت خبر

عمرك سمعتي بيد بين اصابعه فم و يبوّس
.............. هذي يدي لا صافحت يدّك .. وطقطقها الصبر !

صالح العبدالكريم
10-16-2009, 09:40 PM
دامي اعرف وش شعورك وانت عارفني اجل
........... .. ليا متى تبتل تلمّح لي والمّح لك بربّك !

انتظرك تقول احبك بس ذابحك الخجل
........... وانا شفني ما خجلت وقلت لك والله احبك !

لان قلبي لو تحرّك ما تحرّك من عجل
......... ولان روحي لو مرضها العاطفه راضي بطبّك !

صالح العبدالكريم
10-16-2009, 09:41 PM
ارجوك لا تسألني كلّش باين
........ وانا كثر ما احاول اخفي ابيّن !

يا الذ من قولة حبيبي زاين
........ يا اوجع من الدمعه بوجه الديّن !

يا اقصر من الكذبه بفم الخاين
......... يا انزه من الحاكم وفمّه ليّن !

يا اجهر من الديّان باسم الداين
......... يا اخلق من اللي لشايبيه حنيّن !

تغلط واقول انك حبيبي ماين
......... واقول هانت والغلط مو هيّن !

والله لو من غيرك ايّن كاين
......... ما يصبح إلا والصباح مطيّن !

صالح العبدالكريم
10-16-2009, 10:05 PM
يعني مضت كل هالسنين بعمري ما كنّه مضت
................ وما كنّي يا ربي بيدّي دافن ٍ أوجع قبور

يا كثر ما رحت آتحرى أشياء نكهتها قضت
............. وأحاول أخلق للحنين أجساد وأعمار وشعور

أحيان أحس أن الليالي لا انفقد غالي فضت
............. وأحيان ما ودّي أحس بشي يملاني كسور !!

صالح العبدالكريم
10-16-2009, 10:10 PM
يا عديل الروح والنيّات حيّه , ميته
................ ما لحق طيب النوايا غير طيب أفعالي

يا كثر ما للحقيقه دمع لو هلّيته
............... ما بقى من دربي إلاّ جثّتي وظلالي

الكلام اللي قبل لا تنطقه خبّيته
............ أكبر من اوجاع صدرك وأصغر من أحمالي

انا ماني ناقص أحزن والتعب ملّيته
............... كان لي عندك معزّه خلّني في حالي

من يجي أهلاً وسهلاً ، والحنايا بيته
............... ومن يقفّي بارك الله بالمدى و آمالي

لو خذيت من الليالي قد ما أعطيته
.............. كان أقلّه ما سهرت البارحه بلحالي

لا تشب الجمره اللي بالحشا أطفيته
............ شفني ما صدّقت أشيل السالفه من بالي !

صالح العبدالكريم
10-19-2009, 11:29 PM
مثلك انا يا حبيبي ساكت وهادي
.................. والكل منّا يزوّد جرحه عناده

مابي نتحاسب ونسأل منهو البادي
................. ونضيّق صدور بعض ونبعد زياده

شفني ارد السلام وابتسم عادي
................ ...واقول لا ثار جرحك بالغلا هاده

مقدر اشوفك حزين وجالس تنادي
.............. وما اجيلك اركض واضمك ضمة العاده !!

صالح العبدالكريم
10-30-2009, 03:44 AM
صوتيه

http://www.lordaan.com/antweenk.rm




انــت وينك
كل ما فيني تـعب يشتاق لك
بيني وبينك
عجزت ألقى عذر وأتجاهلك !!

كل الظروف تبكي تبيك
هي بـ الأصل منّك وفيك
علمني يعـني هـو زعـل
عشان أعرف شـلون أجيـك ؟

صعبـه أصدّق يا حبيبي
تبتـعد عنـّي وتروح
خل عنــّك خاطري
أحسب حساب الجروح
أنت قبلي راح تتـعب
و تنعمي شوق وحنين
حـتى لو أخفيت دمعك
بكرا تذكرني ويبين !
لا تـفكر لـو للـحـظه
..... أني لامـن غبت أخـونك
والله أنـّك فـي عـيوني
..... مثـل ماني في عـيونـك

ليه العـيون لامن هــوت
بان بمــلامحـها الأرق
وليه البخت كل الفـضا
وأغلب مشاعرنا ورق
مـو هذا بحـر العـشق
اللّي يحفظ وجيـه الحبايب
كيف إنتحاشى أمواجه
وإحنا ميـّـتين من الغرق !؟
صار لي كم يوم
أشوف إحساسك أتغير علي
طاح مـن عــيني زمـن !
وقـــف برمشـي سؤال ؟
لــيه صـارت غـيــرتـك ..
أقوى حـتى مـن الوصـال .!

ما أذكر أن قلبي نساك وراح عـنـّك
لا تحـْــلف
أنــا أدرى فـيه مـنـّك
بس قـلـّي كان ودّك نفتـرق
عادي حبيبي نـفترق
أنـت رح من ذا الطريـق
وألتفت لي
وأنا أروح من ذا الطريق
.والتـفت لك
بس خـل عينك بـ عيني
.لا بغــــينا نحترق

يالله بــس علمني ويـنك
أنشغل بـالي عليك
يعــني ما تــدري حبيبي
أني حيل أموت فيك !

بس إنت وينك

صالح العبدالكريم
11-01-2009, 09:42 AM
يا بُني " الرجُل " فأنا أنطقها على هذا الشكل عندما أناديك مُذ ولدتك أمك ، لا أعلم لماذا إلاّ لأني لم أحب أن يناديك أحد بالصغير ولا أريدك أن تسمعها فتعتاد أذنيك عليها ، أحدثك الآن وتاريخ محبتك بلغ 1-11-2009 مـ وأعلم جيداً أنك سوف تقرأها في يوم من الأيام فعجلة الحياة سريعة إن لم يحدث الله شيئاً
أحببتك كثيراً ليس لأنك أتيت من صلبي كعادة الآباء الذين يحبون أطفالهم ، بل أحببتك كثيراً لأنك أتيت من هذه المرأة الرائعة فوثّقتك أيّما توثيق وفتحت بك وبأختك علي باباً من جنّه وأرتني بكما كيف يكبر الأبناء تحقيقاً لمبادئ طالما كان والدهم يؤمن بها وإنكسرت أقدامه للثبات عليها رغم الكثير من الأرجحه أحياناً والكثير من المفاجآت والصدمات أحياناً أخرى .. لا تقلق من هذا الحديث عند قراءته فـ والدك لم يكن بالرجل الممتاز ولكن بالقليل من الجيد جداً أحسّ بأنه ترك لك ولأختك ولوالدتكما ما لا يخبأ إلا بين يدي الله وما لا يُسمع إلاّ من السماء عندما علِم بأن الأرض أصابها جدب القيم وقلة المبادئ وهوان الناس على الناس ..
كتبت لك هذه وأنا أعلم بأنك القادر على تقييم الأمور في ذلك الحين ولكن هي محاولة يائس من تحقيق لو نصر بسيط يُبل به الريق ويشار اليه بالبقاء ..




http://www.ayaade.com/vb/uploaded/52_01257023168.jpg





أدري صغير ولا خذيت من الشهور إلاّ ثمان
............... لكن أحسك لا نظرت بوجهي تفهمني كثير

كبر الغلالك ودّي إنّك تكبر بعين الزمان
.............. طيّب مثل عمّك لو إنّه أطيب وقدره كبير

دنّقت بإذنك ، قلت خلّك رجل ونسيت الآذان
.............. يابوك حنّا في زمان الناس بياعة ضمير

أبيك لا منّك وقفت بأرض خابرها دفان
.............. إحذر يشدّك ما يشدّ النبت وتفلّ الحصير

وأحذر تهقوى وإنت مالك عازه برطب اللسان
............... ترى الهـقاوي حبلها مبروم ، لكنّه قصير

وإحذر إذا سوّيت خير لشخص تحكيه ويبان
............... واليا بغيت تعرف قيمة لقمتك عاشر فقير

لا تنتقص قدر النقيصه والهليمه و المُهان
............... قل الله لا يبلاني دام العُمر مرهون بمصير

وأرفع يدينك للسما لا ضقت وهمومك سمان
............... واليا عطاك الظل حاجه خبّها ليوم الهجير

وأحذر تخفّي ما تخفّيه المره عند الهوان
.............. لو كانت أمّك ثم أمّك ثم أمّك لا تجير

تر للمره مخبا مخيّط يحفظ الزله عشان
.............. المخبا الآخر منقطع ما يحفظ حقوق العشير

الوقت كل ما يطحنك إزداد قوّه وإمتنان
............ والعُمر كل ما ينفضك لا تصبح لعمرك أجير

قليل تلقى اللي يحب الستر يمشي بإتزان
.............. ويدري الحضاره شعرة ٍ ما بين متربي وحقير

حاول تكون الطيّب اللي لا يدين ولا يُدان
.............. لكنّك أقسى من جبال طويق لا جاك النذير

وحاول تكون الباكي اللي يرتجف حب وليان
.............. لا صرت ساجد بين إيدين الله وتصلّي الأخير

والحين يالله الله يهداك ويصلحك نام بأمان
............. وأنا بسكّر من وراي الباب وأدعي لك كثير




محبتي لك

صالح العبدالكريم
11-12-2009, 08:24 PM
الله لا يعيد الليالي اللي فاتت
.................. مدري وش اللي حدّني لشوفة البيت !!

مرّت علي وجيه وأجساد ماتت
.................. وأبكاني ان الحي أبقى من الميت

ما كل عين ٍ لا دنى الليل باتت
.................. وما كل خطوه تنخطي بياهلا جيت

بعض القلوب لفرقا الأحباب حاتت
.................... ما ترجهنّ إلا على قرايه وزيت

يا بيت وهمومي مع الوقت آتت :
................... اُكله .. وانا بين الرجا والتواقيت

لو المدى يقتات مبطي إقتاتت
.................. عليك هقواتي إلى قلت لي ابطيت

صرت احزن لشوف الشجر لا تحاتت
..................... احسّه اقرب صوره لفقدت الميت !

صالح العبدالكريم
11-12-2009, 08:33 PM
هذا أنا
للحين عايش
ما تغيّر
شي فيني

من فضل ربي
آتنفس
وآكل
وأشرب
وأنام


وأصحى
بعد الساعه سبعه
اقطف الرزق
بيديني

وأرمي
كل لحظه
تمرّ
من الزمن
وافشي السلام ..!!

صالح العبدالكريم
11-12-2009, 08:44 PM
أجمل اللحظات و أسعدها بأرخص ثمن !

كان ذلك جزئية من تخليد صورة الحب البسيط جداً وغير المتكلّف والخالي من مرغمات العصر عندما كانا على مقربة ٍ من رصيف ذلك الشارع الجميل والمكتظ بالعشّاق والذي توشحت جدرانه بالرسومات لألتقاط الصور بجانبها !
وقفا لدقائق لألتقاط ما يمكن إلتقاطه من الأنظار المحيطة وقبل ان يفاجئهما المصوّر بطلب التقاط صوره بحثاً عن الرزق ، سبقه بزمن ذلك العاشق وطلب منه وهو يرتدي أقل ما يجعله أنيق بذات الرسومات التي تحيط به والحقيقة التي سوف يضع يده من خلفها ..!
عند الإنتهاء من التقاط الصوره في ثوانٍ ولحظة توثيقها في الهواء طلب المصوّر منهما خمسة دراهم معدودة ، فتم شراءه لمكانه ولكل ما احاط به تلك اللحظه من صدق و حب وحياة متحرّكه إستطاع المصوّر تثبيتها بثمن ٍ بخس ..

الكثيرون يجهلون المعنى الحقيقي لشراء السعاده وفلسفة الثراء العاطفي !

صالح العبدالكريم
11-19-2009, 07:48 PM
http://www.ayaade.com/vb/uploaded/4_01258648414.jpg





تعالوا نقسم هالفرح
مثل الفلوس
العيد كل العُمر عيد
دام البساطه في الحكي
نفس البساطه في النفوس

صالح العبدالكريم
11-27-2009, 03:53 AM
كل عام وإنت الخير نبض ومحبّه
............... وأقرب من أنفاسي لو أنفاسي قراب

وأنا ورب البيت لو جيت أشبّه
................ لا أوصدت باب من الشبه ينفتح باب

خبّيت قلبي في ضلوعك وخبّه
.............. عن قرصة البرد وسواليف الأهداب

وإن شفته ناقص تربية حب ربّه
............ وإشره علي إن جيت لك أطلب أسباب

إنت الوحيد اللي قبل لا أحبّه
............... ما كان لي عيد وأصبّح به أحباب !!

صالح العبدالكريم
12-12-2009, 12:16 AM
أبشّرك طيّب من الله ومرتاح
.......... من فضله أطلب ما أبيه ويجيني

عندي ثقه بالدمع لو ثقّل وطاح
......... يطيح وحده وإنت باقي بعيني !!

صالح العبدالكريم
01-07-2010, 08:13 PM
مجنونه وحبت مجنون
............. مو نزوه ويا ليل اللّون

إلا حب راهي ومتهندم
.............. من ارقى مصحّه بالكون

قالو مرّه نسوي حفله
.............. ونتنكّر بس لين نمون

جت يمّه وريحتها زعتر !
.............. وجاها وهو فايح كمّون !

والحب اللي يبدا بموقف
.............. مثل اللي راكب بالون

يشوف الدنيا كتير زغيره
............ وليك اسبوعه بسبع قرون !

حاول يعني يسوّي فاهم
............. ومسّاها بكلمة " باردون "

وسوّت فيها تبغى تشخّص
............ لبست له( كرته )و( شيفون )

ضحكتها عنده بالدنيا
............. ولو يضحك خار المزيون

ومن يلمح بالثاني ضيقه
.............. يبدا يشرح كيف تهون

قالو ندرس شكل الارض
.............. ولا لفت بتلف شلووون

يا إمّا " جاليليو " صادق
.............. او شارب وقته الملعون

كل حاجه بالدنيا تفسّر
............... ومو لازم تفسيره يكون :

زي اللي رافع يدّينه
............... ويسأل ربّه بيض عيون

اطعم ما بالحب اسلوبه
............... ومجنونه تناقش مجنون !!

صالح العبدالكريم
01-07-2010, 08:15 PM
هات من الآخر حبيبي
تعبت اعيشك من وهــم
تعبت اقول :
ان الزمن لو خان
تبقالي : اهم !

ما تبتعد .. ولا تخون
وتصير لي الصدر الحنون
وإن انكر الحسّاد طيبي
تضمّـني حيييييل وتقول :
خل هالدنيا لهم .!

بس الأكيد اني تعبت
ملّيت حتى من الكلام
فهّمت قلبك كم مرّه
بس يا حسافه .. ما فهم ..!



وانت غالي
والمكان اللي جمعنا .. ما يبالي
والليالي سيف يجرح
وأول جروحه سؤالي
وش يهمّه ؟
لو نسيناه ومشينا
غيرنا ممكن يلمّه :
لا بدى خاطره يسرح
وقلبه من الشوق خالي ..!!


قلّي بس /

شلّي بقابي
لا طلبته ما عطيتك ..
ما بقى الا غيابي
لو بتطريه احتريتك !

والمشاعر من خذاها
او عيونك من ملاها
والصبر انفاس تحرق
كل ما التفتت وراها
وطاح من طوله .. عتابي .!




انت كلّك فيني ساكن
بس انا ساكن بقربك
ما شربتك شوق لكن
كنت بضلوعي اشبّك

كل ما تغفي بعيني
هزّك الرمش ويديني

ما ابي لحظه تنام
وانا منتظرك تجيني
تحكي عن حبي وحبّك ..!

صالح العبدالكريم
01-07-2010, 08:30 PM
[ .. صاحـ....بي ] !

جيتني هالحين .. تدري
كلّي من الأشواق هالك
يقطر عرق قلبي : تعب
لا تقول لي سهلك : صعب

ملّيت أدورني معي
والقاك جايبني لحالك



يا ساكن ٍ بين الحنايا
شوف وشلون السنين تغيّر نفوس البشر
شوف نفوس البشر وشلون تغيّر هالسنين ؟
ما يهم من غيّر الثاني
عمرك سمعت بأعترافات الجسد
وإن الخطا ماهو اناني ..!

كم لي :

وانا ابري هالقلم .. للكحل ..
وأرسم به عيون

كم لي :

وانا اشرق بالعسل .. للنحل ..
وتقرصني الضنون !


واوقف وانا حيلي ضعيف
لو كنت عاري بس نظيف
واقول :
يالله ما بقى
من العمر كثر اللي مضى
وشعاد لو صارت فصولك يا القلم
كلّه خريف ..!






[ .. صاحـ....بي ] !

مرّيت شفت الوقت فاضي
قلت يمكن أشغله !؟
جيت له .. والحزن قاضي ..
لو تدفـّه بس : طاح
لو تعصره شوي : صاح
ما مداني اسأله :
هو بقى للقلب ماضي .

قام وهز راسه و تنهّد
وشال ايامه .. ورااااح ..!




قبل أمس
وانت ادرى بأمس
وما تعـْرف اللّي قبل

يوم إنطعن ظلّي بشمس
ما قلت له : منهو طعنك
أو ما تبي أشيل عنك
خلّه جزاه إنـّه معي
لو يرتفع صوته يهمس
باقي من .. حباله : حبل .. !!

بسكت ولو دمّه يسيل
لو خطوته قامت تميل
وابل حلقه بالسراب
وانا ادري انه ما يبل ..!؟





[ .. صاحـ....بي ] !

جيتني هالحين : بدري !!!
لاحظ بها صيغة تعجّب
دامي ادري بك توجّب
والنظر يعميه قدري
والمدى سكّه طويله
إنفظت عنـّا شليله
كنها : ثار بــدوي
ما برد لحظه غليله
( وفرّغ حلوفه ) بـ صدري ..!



جيتني هالحين .. مدري
بس اتحسس حروفك
تشبه ظروفي ظروفك
وآخر المشوار صفحه
لو تغافلته تشوفك


ما إنبنى حلم الليالي :
إلا بيدّين السهـر
والحين شوفه ما يبالي
طقة عروقه قهر

وأحذره
إنكتم لون السواد
ومْل يمسح وجنته
ويخط بأصباعه طيوفه

وأعذره
إنتظر وقت الحصاد
يومه اسقى نبتته
ما طلع له غير خوفه

والحنين اللي كلاه الوقت
لو طوّل يهذري
ما لقى اللّي يسمعه
غير خل ٍ لا نساه
قال خلوني معه
" إنقطع بذره و بذري " ..!!؟









[ .. صاحـ....بي ] !


طقـّيت فخذ الوقت حرّه
كنت متحسف علي
وإن كان يعنيك الصحيح
كنت ضايق مرّه مرّه
من الألم ماني خلي
يا كثر ما وقفت أحلم
وآخر الوقفه اطيح




عمرك سمعت :

إن الشوارع بعضها ياكل بعض !

عمرك سمعت :

إن الأصابع ينبت لها سنون وتعض !


أدري ولا عمرك سمعت

لانك إذا ضاقت بعينك : دنيتك
تجهز شناط الكلام
والتذكره : برد و سلام
وإقفايتك ببساط ريح ..!







تبغى الحقيقه

مدري وربي وش ( بقول ) !!
تراي حالف ؟
والله ما عدت آتذكر
حتى باب العقل سكّر

لا تقول ما يخالف
فكّر وخلني أفكّر
كنا نحكي بالهموم
ايه نحكي بالهموم
ليه إذا جتنا دخيله
تنتقي الصدر الكتوم
ولا عبثت به
وكسّفت به
راحت لغيره تشكّر ..!!؟

اخاف نظلمها حرام
يمكن تحب السوالف
يومها عجزت تنوم ...,..!

صالح العبدالكريم
01-07-2010, 08:35 PM
وانت يا الخفّاق وشبك تنوجع وتمص دمّي
................ ليت لك نبض ٍ يلمّك لـ اشتكيت من القهر

كان ما ولّيت وجهي للحنين وزاد همّي
.................. وكان ما قـلّبت نفسي بين يدّين السهر

كم تعيزم فيك ضلع ٍ للعنا وقرّبك يمّي
................... وكم تمرّك من سنين وإنت عدّاد الدهر

يا الكبير اللي نبت لك اجنحه بكيفي وكمّي
................. وش خذيت من البساطه غير طعنات الظهر

إن بغيت تطير هذي فرصتك والدرب فمّي !
.................. وانت حدد يا تموت بأول او تالي الشهر !!

صالح العبدالكريم
02-28-2010, 10:53 AM
يا صباح
البسمله
والنبض
والشوق
وصباه

يا صباح الممكن
اللي كل ما اشمّك
يصير

هذا قلبي
واسأله عنّك
وعلمني معاه

ليه أحسّك
بين ضلعين المسا
كائن يطير

كل ما جيته
دخل بخدود ضحكاته
وّراه

الف غمّازه
تفل الوصل
وتردد كثير :

شفت
كيف الصبح طيّب
من برودته لدفاه

إنت أطيب
يا بعد راس المودّه
و المصير !

صالح العبدالكريم
03-14-2010, 02:36 AM
كم صبح مر بطيفكم واحتضنته
.......... احيان أسولف له ، يسولف لي احيان

وكم ليل حن وبالشوارع دفنته
............. أخاف من طاري الغلا وجهك يبان

يا ساكنٍ في كل درب سكنته
.............يعني يهناك ان آخرت عشقك جنان

والخافق اللي صان حبك وصنته
............ ... خلّه يموت بعِزّته قبل ينهان

ماتشوف صبري فالمواعيد خنته
..........وما تشوف حالي هدها قولة انسان

صالح العبدالكريم
03-15-2010, 11:44 PM
أيا ريم
ولك ِ أن توثّق هنا كما وثّقتها ليلتك
لم تكن زفّة بقدر ما كان إحساسك ِ الحدث وسعادتك ِ المنال
جمع الله بينكما في خير




http://www.ayaade.com/soot/zafah.rm





الليلة هذي ليلة افراح وأغاني وإهتمام
.............. الليلة هذي ترقص الغيمات ويفزّ النسيم

الليلة طار من السماء ورد ونواوير وحمام
............. الليلة دعوات الطهُر ما بين زمزم والحطيم

الليلة حتى الأرض تلبس مخنق وعقد وزمام
............. ودّه تكون الحاضرة بالحفل ما بين الحريم

......................................


........................


.............

صالح العبدالكريم
03-19-2010, 11:35 PM
أحيان ودّك لما تحكي تترك أشياءك بعيد
............. يمكن عشان أزرق سماك يظل زاهي ما بهت

والكلمه اللي تختنق في قلب صاحبها تفيد
.............. لانها ترجح بكفّة صدقها لو هي لهت

الوقت هذا ما يجي بالساهل اللي ما يعيد
.............. نصفك اللي لو سجدت لغيبته عينك سهت

إيه أحبك لو أحبك توجع اطراف القصيد
............. وأسمع اليا اطريت أسمك كيف خفاّقي نهت

جيت لك واطرافي فيها من الحرارة ما يبيد
............. ثالج أطرافك مع أنك قاسي وجروحك رهت

صالح العبدالكريم
03-29-2010, 03:34 PM
عطني بعضي !!
صعبه .. تاخـذ كلّي
وابقى بدون شي ..!؟

ولاّ اقولك :
لا نويت انك خلااااااص
ما ترجعني لنفسي
مرّني .. وطمّني اني طيّب
وللحيــن حــي ..!

كنت قبلك شخص عادي !
لا احب .. ولا ابوح
يعني خذها بأختصار :
ما عندي اية فكره عن سر الموالف
كنت حتى ما اعْرف شمعنى : قلب
إلاّ من بعض السوالـف ..!

كان حدّي لا زهـقت
ادخل بمخباي .. يدّي
واجلس اصفـّر للجروح ..!؟

تصدّق انّي :
كنت جداً طيّب
وجداً مزوح
يووووه لامني ذكرت
شلون كنت
قبل اعْرف شلون .. ياخذني العشق
وتنهيني انت ..!؟

انت احبّك .. وادري انّك لو بعدت .. تحبّني
............. وادري ان باطنك للما .. وظاهرك يم السحاب

شف هربت من الزمان وجيت .. تكفى خبّني
..............وخلّني داخلك عاري .. وانت دوّر لي ثياب !

كم مدحني شخص .. واثره من وراي يسبّني
.............وما طرالي والله ادفن ذمـّتي .. تحت التراب !؟

تدري .. !؟ صعب الهم وحده يقدر انّه يطبّني
..............إلا في حالة : ذكرتك .. ينفــتح له الف باب

شفني فاضي .. وانت دامك ممتلي بي عبّني
...............عبّني ولا شفت اني بنفجر .. فـش الغياب

دامني للحين اشوفك .. لا انوجعت .. تنبـّني
...............إعرف ان البال .. ودّى بسالفة طيبك وجاب

جاب .. كل اللي تقوله : بأنه صدق يحبّني
............واني شفت بعيني قلبه ,, ودّع ضلوعه وذاب !!


ذاب !!
ذاب .. تدري شمعنى ذاب !؟؟

يعني انّك كل ما تفتح خفوقك
ودّك بخلّك تشوفك !
ما تلاقي إلا الغياب
حاضر بترديد خوفك !

صالح العبدالكريم
03-29-2010, 03:38 PM
ياه يا صبح الحنين
لا تخبّا وسط صوتي
فكّني
خلني أتظاهر إني مبتسم
خلني متماسك
وخلك حزين

جيت بدري
جيت افضفض عنك صدري
يا جريح
جيت أدوّر فيك راحه
ليه تبغاني أطيح
يعني عاد القاها منّك
وإلاّ منّه
يا مُعين الصابرين ..!




فمان الله يا قلب ٍ غمرني بلطفه وطيبه
فمان الله يا عشق ٍ حفظته بالضلوع سنين

لو اقدر أحبس الدمعه عشانك وأجمع الخيبه
قدرت أمشي لو حمولي كبيره بالقسا واللين

وأنا والله لو بحسب جمايل وقتي وعيبه
حسبت إنه لفابك لي ولكنّه خذاك الحين

أحبك كثر ما شانت وجيه وطاحت مصيبه
أحبك كثر ما عاشت مواويل السعف والطين

أحبك كثر ما ينبض خفوقي وإنت تدري به
أحبك كثر ما طعنت غيابك توجع السكين

يغيب البال ما كن الليالي ضاقت بذيبه
لو إنه جاع للصوت الطويل وجرّة المقفين

طواه الضيم لكنّه طواه وهيبته هيبه
رغم لؤم المدينه والمباني وغفلة الصاحين

فمان الله لو غصّت عيوني بدمعة الطيبه
وأنا واقف على باب الفراق أتسوّله : مسكين

عشان الله إذا عندك بقايا تضحيه جيبه
ترى ضاقت بي أنفاسي ولا أدري أروح لمين ..!


أروح لمين
أروح لمين
وأنا كل ما هدا قلبي
وخفف من بكاه
تبين ..!

صالح العبدالكريم
03-29-2010, 03:38 PM
[ إحتياجي ] :
مو لأن العيشه من دونك دمار !
العُمر ما يوقّف لغيبة أحد .. .
حتى لو نصفي يتقطّع ،
ونصفي الثاني يغار ..
بس إن جت للحقيقه ؟
لأنك أكبر قطعه في قلبي .. .
و [ خذوك ] !

وإنت شوف شـ قد تبعد هالمسافه ،
لإنتهوا منك .. و رموك !
وجيتني ،
ويديك تتنافض [ تعب ] .. .
وقلت لي عطني علاجي !
بعدها بـ تعرف صحيح ..
شلون تدمنك الجروح ،
شلون يدمنك [ إحتياجي ] !

يا إنت .. .
وإنت أكبر من إنّي أخفي وجهك وأختفي ،
أو أدوّر منك زلّه ..
أو أغثّك وأكتفي !
أو أشوفك تشحذ الما من يديني .. .
وأنثره بالأرض !
و [ يذلّك ] هماجي .

تبقى غالي ،
مو بيدّي إمنعك !
لا جاني من طيفك [ وله ] ..
لأني أعرف من قبل لا أعرفك ،
إن بحر العشّق غدّار بـ هله !
وإن لو نصفك ظلام .. .
نصفك الباقي [ سراجي ] .

صالح العبدالكريم
03-29-2010, 03:39 PM
المسافه
اقسى ما يطري وبال البال ساهي
وأكثر الأشياء مخافه
لا غدت كلمه تحاشها الصدور
وتاخذ البال وتدور
تاخذ البال وتدوووور
تاخذ البال وتدوووور
وتكبر اكبر من حسافه
وتوجع أوجع من كسور

فاضت عيون السماء من هالحنين
وكف نادي
وحلم لكن حلم غادي
وطعم ذاقته السنين
يا كثر ما مرّت ايامي بعيوني
ناس واجد
يا كثر ما صرت احس بقلّبي
بين ضلوعي ساجد
واتركه منّه لربّه
واسمعه : يا رب احبّه
ويبكي شوي ويناااام
ويا وجع نوم الحزين
لا درى بـ إن احد شافه !!






مثل ما انّك على قد السوالف جبتني لأقصاي
تجيبك لي النوايا أشباه .. لين اجمّع ظنوني

وانا عندي النظر يطوي الفراغ وتستريح خطاي
لاني من زمان ازرع صدق والناس يجنوني

هذاك اوّل .. وأنا اسمّع شوارع حيّنا مغناي
الين انّي صمخت إذن الحمام وطيّر لحوني

احط ايدي إلى ضاقت علي سنيني : بمخباي
واظل انفخ هواء صدري /اصفّر /ارجع بدوني

لانّي كنت .. الى منّي سمعتك تنتخي دنياي
اروح اكسر لجل تهنا .. خواطر ناس يغلوني

اجل لو كنت ما تدري فأدر وسولفه للماي
عشان اليا مشيت اذكر بأنك اوضح طعوني

تلمّستك طهر .. وادري بإنك كل يوم براي
وذي غلطة عمر تنهش بقلبي وتنزع جفوني

ولكن لك اجر إنّي عرفت اصحابي من اعداي
وعرفت اللي اهم اني اشوف الموت بعيوني !






المسافه
مثل من يتلمّس اطراف الحياة
والعمى هدّد كفافه !

صالح العبدالكريم
03-29-2010, 03:58 PM
http://www5.0zz0.com/2009/10/01/18/783455517.gif






فز عصفور الفجر من عشّه
................... وأنعش أنفاس الفضا تصفيره

كن خلقه ضايق وبيفشّه
.................... قبل توذيه السكك و الديره

لو جناحينه صغار وهشّه
................... ولو تحامل لطفه بتصغيره

يكفي الفرحه يعرف يخشّه
................... بين أغصان الشجر تصبيره

وإن ظلام المقدريّه غشّه
.................... ما تعلّق بالسهر تفكيره

نام بدري والأماني طشّه
................... من سماه لصحوة التكبيره

كن لحظات العمر مختشّه
.................. والدفا طعم الوجع والغيِره :

لا تنافض والغيوم ترشّه
................... وراح يفتح للسما ازاريره

غرغر بملح الدروب وقشّه
................... من يباس وريشتين وجيِره

موتته قبل العقول بوشّه
................... يا عِظم هالموته وتعبيره

توقد بصدري حنين ونشّه
................... وتترك بعيني كلام وحيره

عن صغاره والطعام وعشّه
.............. ما ترك غير المدى و الخيِره !!

صالح العبدالكريم
03-29-2010, 04:22 PM
تـأكدي كيف الوفـا, بعدين قولي مـا تبيـن

.......انتـي معك نصف الحقيقه ونصفها الباقي معـاي



إن مـا يـجي للحب شرع ٍ يجـبرك انك تـجين

.......و الا فلا لك وقفـة ٍ تستاهل اشـواقـي وعنـاي



ملّيت من كثر الألم وش عـاد بـاقي ترتـجين

.......دام الامل اصبح على قـوْلتك ابعد من رجـاي



تدريـن احبك من عرفتـك طفلة ٍ تنظر بعـين

........من فتحة الباب وتـطاول نفسها واظهـر غباي



خايف الى منّي وقفت وقلت اشوفـك تستـحين

.........وتضيـع فرصه ما يتكـرر مـثلهــا وهذا بــلاي



هـناااك كنتي ساكته وهناااك كنتي تضحكين

.........وهناااك لا منـّا لِعـبنا ما تـجـين الا وراي



وهنـاااك كنـّا نجلس ونبني عشش وبيـوت طـين

.........واكبر طمـوحك لا سكنـّا فرشة الخـوص وغــداي


مـا كنت ساعتها اخـاف الا من انـّك تـــزعــليـن

..........ولا شي يهـمّك وقتـها الـ انّي اظهر لك رضاي



الله يا هـي حالـمه ذيـك البراءه تــذكــريـن

...........وشلون كنت اسابقك لا اسبل همومـه مــساي



واكذب واقـلّد (صوت عوّي) واقــول يمـّه تسمعـين

...........عشان اجي وامسك يديك وتبتدي لحظة هــناي



وش كنتي لي غير المدامع لا غدى وجهي حزين

...........وش كنت لك غير المعزّه من ورى همـّك وجـاي



واليوم شوفي وش كثر مرّت على الذكرى سنين

...........واحـنا نجـادل بعـضنـا هـذا خطاك وذا خطـاي



ودام النوايـا باقيه للحيـن تـنزف ياسـمـين

...........جيت اعتذر لي عنك واسأل يا ترى هذا جزاي



انّي نـثرتـك بالفضا عطر وعلى صدري ضنـين

...........وانـّي رسمتك طفلة ٍ تلعب على غيمـة سماي



واني حسبـتك في عيونـي ولو عزمتي تبعدين

..........حدّك تـعسّين الـهدب وتـسولفي له عن وفاي



حسبي على الايـام كاني كل ما قلت بـتزيـن

............مـا انتهي مـن كلمتي الا ويـظهر لي شقاي



والحين يا عمري خلاص احسن لك انك ترحلين

............هي حاجة ٍ بالقلب ماتت مثل ما مـاتت خطاي



كل الشوارع اصبحت تلفظ لي انفاسـه انـين

...........دام انكشف وجه الـوداع وطاح من طوله غـلاي



لاني بأول من مشى تايـه ولا يدري لويــن

...........ولا أنتي اول من طعـنـّي يومي اعطـيتك قــفاي!!

صالح العبدالكريم
05-16-2010, 10:04 AM
أحس بإني فاقدك اربع اعوام
................. رغم إنها اربع دقايق ، ولا زلت

أسمع خطاوي صوتك بهيئة أقدام
................ تهز صدري لا انحنيت وتمايلت

لو كان لي في داخل أنسامي أنسام
............. ما شفتني ساكت ولا شفتني قلت :

إنك تشيل همومي وتزرع احلام
............ وإلاّ أنا غير الغلا بربّك أش شلت !!

صالح العبدالكريم
05-22-2010, 06:58 PM
مع تمنياتي لكما بمزيد من المحبّه
واسأل الله أن يزيدكما نعمة ًومودّة

http://www.ayaade-up.com/10-Years.rm

لكما ذلك ..

صالح العبدالكريم
06-06-2010, 04:16 PM
مدري هاللحظه وش اللي جاني
إحساسي كثيييير
وشوقي
اكثر من كلامي
وعاطر أنفاسي
مثير

من زمان
وهالشعر يعبث بصدري
من زمان
ونبض قلبي
لا تحسسته يطير

مدري
في أية سنه
فتّحت عيني ولا سرحت
أو متى أول فرح
مر بحياتي وإنجرحت

إيه أنا هالحين فاقد ذاكره
إيه أنا هالحين فاقد ذاكره
مرّات
أمشي فوق الأرض
ومرّات
أمشي تحت الأرض
ومرّات
مدري وين الأرض
عشان أسولف بالمصير

كنت أعتقد
إن الحياة
إنصاف حي ولو يموت
لطفك يا ربي
وأنت أعلم
بالنوايا
والبرايا
والبيوت
والنفس ما تشبع
سوى من نفسها
لو تاكل
أطراف الليالي من سهر
لو تشرب
حثال الأماني من قهر
بكرا بتصحى
والصباح أدياك
وأشجار
وحكايا
وجدارنا ماهو قصير !!

صالح العبدالكريم
07-26-2010, 04:39 AM
آحس في قلبي كلام ولو حكيته ما وصل
................ أحيان تاخذ أقصر دروب الهروب عن الكلام

إن كنت صادق وأكثرك مو ملكك وحبك حصل
............... جنّب عيونك لا تشوف البارز من أقصى العظام

يا صاحبي وأجرأ حنين إن طرّفت عينك خصَل
............... من شعر محبوبك ولا أنت بقادر تحب وتنام !

صالح العبدالكريم
07-28-2010, 08:55 PM
ودّي أحطّه بأيد وأيامنا بأيد
.................. وأرفع يديني للسما وأدعي الله

إنه يجي قبل الصُدف والمواعيد
................ وإلاّ أوصّل ياس محد ٍ وصلّه

البعُد ضلعين الشقا والتناهيد
.............. إن ما كتم صدر الليالي يعلّه

ينقص كلامي عنه والخافي يزيد
.............. وأقول لو غرّوه بالمدح ، أقلّه :

ما فل صدري وإنحنى للبواريد
............. وخلّى الصور ترتادني في محلّه ..!

صالح العبدالكريم
07-28-2010, 08:56 PM
أيحق لي ما لا يحق لغيري
......... ... إن قلت أن نوافذي عيناك ِ ..!

أحببت ُ أنك ِ لم تكوني مثلهم
............ لأكون أفقر عاشق ٍ لغناك ِ ..!

صالح العبدالكريم
07-28-2010, 08:58 PM
منتا غريب
تعرف اللي صار لي لو ما حكيت
منتا غريب
الزمن علمني إنّي لو أموت الفين موته
ما شكيت ..
شف كثر ما دار من خلفي كلام
ما تندمت إني طيّب
ولا دخل صدري ملام
جايز إن الملح بضلوعي تكسّر
وجايز إني مختنق
بس إستحيت
أحكي عن ذيك السنين الحالمه
أحكي عن طٌهر القلوب
قبل تتبدّل وأغيب

يا رفيق الدرب الأول
والزمان المُر
وأسرار الكلام
إدخل بصدري وشوف شلون مهجور وظلام
طاح كل اللي بقابي من حنين
طاح حتى الطاري اللي ما طرى للحين
وأشعلني جفا
كل ما أضويت منّي إصبعين وكف
صحّاني ونام ..!

منتا غريب
كلها كم يوم وينشف جرحي
وأتشاوى وأطيب ..!

صالح العبدالكريم
07-28-2010, 08:59 PM
خلاص يعني ما بقى لأيامنا الحلوه أمان
............. ولا عاد باقي للحكي قيمه وللحيره مصير

شفني على قد السمار اللي ملا وجه المكان
............. مو قادر أشري راحتي وأبيعك لنفسك وأطير


لو كنت قادر أتركك والله تركتك من زمان
........... ولو كنت ناوي احرقك ما رحت اضمّك بالأخير

المشكله كل ما نويت أصير في عيني جبان
........... وأروح مثل اللي يروح ودرب خنّـاقه قصير

أرجع وأفلّ الذكريات من القسى لين الليان
............ والقاك في أغبى مراحل عشرتك قلبك كبير !

صالح العبدالكريم
07-28-2010, 08:59 PM
سلامة خاطرك
لا باس
أحس بدمعتك داخل كلامك
والهدب كرّاس
تجين أنقى من اللآزم
تجين أعمق من الإحساس
كأنك من كثر مـ أنتي رقيقه
تلبسين أنفاس
يا طيـّوبه
يا صوره ما لحقها خدش
ولا تزييـف
ولا خُلقت من أكذوبه
يا محبوبه
يا سِتر الضايق وثوبه
عن وجيه السكك والناس

سلامة خاطرك
لا باس

صالح العبدالكريم
07-28-2010, 09:01 PM
http://www.filaty.com/i/805/bf1ce69.(DSC03258)40.JPG






ما كننا جيناك يا هالضلع والعيشه وجع
.................. وبتنا على جال الغرايس نحفر وندفن سنين

يا سرعها مرّت وانا مرّيت والميّت رجع
................... والكل منّا ينتفض من حزنه وكثر الحنين

الدمع صوت ٍ للمحاجر لا تغافلني سجع
................... واليا بدا ينقط على الخدّين تسمع له ونين !!

صالح العبدالكريم
07-28-2010, 09:04 PM
يا الطريق اللي لك إيدين الغياب تلوّح
........... مدري ليه أهرب لك اليا ضقت من أحبابي

أسمع أرصفتك تمجّ الحكي روّح روّح
............. والبس من الذاكره وجهك وأفلّ أعصابي

وألتفت والضوّ الأصفر بالنخيل مشوّح
.............. وأنحني وأسمع ضلوعي تنكسر من مابي

مختنق والدمع بأطراف المحاجر فوّح
............... خايـف إنّي لا نثرته ما يبلّ أهدابي

جيت لك والصمت ينهش خافقي ويطوّح
............... بالحنين اللّي مسك جلدي وفجّ ثيابي !

صالح العبدالكريم
07-28-2010, 09:05 PM
يا أصدق الأحباب
فضحتني ، ما كن لي قلب
ومشاويرك سراب
دوّرت لك بين الضلوع ضلوع
لكن ما لقيت
أضويت لك أهداب عيني ورحت
لكنّك بقيت
تاخذ من أنفاسي سوالف رعشتي
وتزرعني للذكرى صور
وتنبت لك غصوني عتاب

فاتت
وأنا ما فاتني إلاّ الوجع
والليل ما شكّل مطارحنا أبد
والهاجس اللي راح مع روحتك
ما طلّ ورجع
فلّ الجناح وطار ، طار
طار وخذا معه المدى
وأشياء ما تحصى ، كثااار
وأنا يديني أطول من العُمر
وأكمامي قصار

شفني أنادي للسما
وأتشكّل لصوتك سحاب
شفني إلين الحين أفتح للقا مليون باب
وما أجيك
وأكذب عليك إن قلت لك
ما أوقّف الساعه أحتريك
لكن تعبت
وهاك قلبي إبيّضت أطرافه وشاب ..!

يا أصدق الأحباب
يا أعز وأغلى من جمعني
وذوّب آمالي وذاب
من متى كان لملامحنا شبه
وأحداقنا تمطر ضباب
بللتك بجسمي وشربك الجلد
وأعطيتك صفاتي
خلّيتك تعلّمني كيف أهتف لهم :
يحيا مماتي
والحين شفني أعرّي الخاطر ندم
وألبس لك الضحكه ثياب

أبوس روحك
قلّي وش اللي غيّرك
وشفيك صاير حكوه بلسان الزمان
ومتعثّر بسبّة وضوحك
في غيابك أجمع ظنوني وله
ومن غلاتك .. يحظن الشوق الهدايا
وآتلوّن لك سلام ومغفره
وأرسمك نور .. وأهندم لك زوايا
وأدري
أدري ما دمّرك إلاّ حاجتين :
_ قلبك الشفّاف
_ وحكاية جروحك
بس واللّي خلّد العشره بقلبي
وخلّدك
كل ما ضمّيت طيفك أعتبرني
حي وأتنفّس غياب ..!

صالح العبدالكريم
07-28-2010, 09:05 PM
يا صاحبي .. ماني على كيفك
............. يا تحبّني بكل إختلافاتي .. أو رح

إسلم وسلّم .. وإن تغانمت طيفك
............ إرم الصور وأجمل سواليفك .. وطح

انا تنفّستك غلا ... قبل زيفك
............ والحين : شفني .. لا تحسستك آكح

من علّمك غيري تـّفيا بصيفك
............. وادفاك .. يوم المربعانيـّه تفح

خلك كذا .. دامك تباهى بريفك
............ ناسي بإن الغيم بإمكانـه يشح

باكر إذا الله احياك واحيا وليفك
............ تدوّر الصيحه .. ولا اقولك صِح !

صالح العبدالكريم
07-28-2010, 09:06 PM
حبيبي للعشق سيره طويله وللجروح أرقام
................. ترى ما مات من ورّث غلاه وثبّـته بدري

انا ما كنت ادوّر بي ملامح والوجيه ازلام
................. ولكن كنت ادوّر بك هواء يتنفّسه صدري

فقدتك وآآه يا شين الحنين ونظرة اللوّام
................. متى ما جت على مشهى الزمان وطيحت قدري

كثر ما اتخيلك تسحب يدي وتضمّها وتنام
.................. كثر ما ودّي اهرب من جحيم الذاكره لـ :













مدري !

صالح العبدالكريم
07-28-2010, 09:07 PM
لو جت علي .. مارحت أدوّر من ورى جرحك دوى
.................... لأنك كذبت ..!؟ وما أحب الشخص لا أخطا .. جحد !!

بس الغريب ... اليا مشيت لحالي ! القانا سوى ..!
........................ وأسألك وش جابك معي ... ! وتقول ما عندي فأحد !؟

يا أمّا عقلي ما يجمّع صح ... ! وبراسي هوى !!
........................ يا أما ناوي إنّك تحدّا .... هاااه خرّبها ..؟ وتحد !!


http://www.ayaade.com/vb/images/smilies/n.gif

صالح العبدالكريم
07-28-2010, 09:08 PM
http://www.moveed.com/data/media/126/1ddff67792ea83f4.jpg







كثر ما كنت أأمن له .. واخافه حيل .. وأحتاطه
..................... كثر ما كنت اصوّت له ... وأبرهج بابي ويجفيه !

شسوي بجرحي ..!؟ دام انّه فتحه وما رجع خاطه
...................... شسوي بقلبي ..!؟ دام انّه معاه ( الله لا يعافيه ) !

كذا .. من دون ما أدري ... لقيته رتّب شناطه
...................... وأنا للحين مو قادر ارتّب ... وش صدمني فيه !!

اقول أحيان يفهمني ... واطوّف أكثر أغلاطه ..!
....................... وأقول أحيان ... أعطيته من الأعذار ما يكفيـه !

وانا بالحالتين ... أدري بسرّ إحباطي .. وإحباطه
....................... وأدري : إن الزمن يظهِـر مع الأيام ما نخفيه ..!!

صالح العبدالكريم
07-28-2010, 09:11 PM
ليتني طعتك يا قلبي
كان خلّيته ورحت
خذت نفسي بنفسي يَمّه
كنت اقول أخطاءنا : ماهي مُهمّه
أثرها نزعات موت
وشفني بين ايديه طحت ..!

موووووووت
يا موت الزمان
وتمتمات الصدر
وأصوات الضلوع
والحنين اللّي أكل وجهي وهو يبكي لي :
جوووووووووع
جوووووووع
جووووع

وأنا يدّي تنتفض
وأطراف رجليني : خشوع ..!!؟

صالح العبدالكريم
07-28-2010, 09:11 PM
أحيان تتفاجأ بأنك للأسف طيّب كثير
............... وفي وقتها ما تسعفك ضيقتك حتى لـ الندم

والكلمه اللي توجع الخفّاق وتخج الضمير
................ مثل الفـقير اللّي بنى بيته بيدّه وانهدم

قولوله إنّي بدون حسبه زايله : ابقى كبير
................ وقولوله إن الناس ماهي عند رغباته خدم

إمّا نصير لبعضنا أقراب ، وإلا ما نصير
............... مو كل ما قمنا نعالج صدمه نرجع ننصدم

والله لو ما للغلا : هاجس وأحداق ومصير
.............. لأرمي تراتيب الحكي من وسط صدري للعدم !

صالح العبدالكريم
07-28-2010, 09:13 PM
http://www.physics.org/UploadDocs/Feature/images/newtons-cradle.gif






إحنا مثل اللي يبي التركيز والواقع مشتت
.................... كل ما سالت دموع الصبر سيّلنا دموع

ما بقى عظم ٍ تحمّل وقفتي إلاّ تفتت
................. وأنت ادري الله يعينك ناطر وشايل شموع

صالح العبدالكريم
07-28-2010, 09:14 PM
هالحين جيت تنشّد الناس عنّي
................ ما كن لك درب ٍ مع البعد طوّل

خيبة ظنّك وانت خيبة ظنّي
............... ثنيننا محنا على العهد الأوّل !!

صالح العبدالكريم
07-28-2010, 09:14 PM
صحيح احبك بس مابي ابيّن
............... يمكن عشاني ع الفراق متعوّد

نحف العواطف هدّني يا متيّن
.............. ما تشوف قلبي بالضلوع متجوّد

هوّد يبو القلب الرقيق الحنيّن
............... لا تجمع انفاسك بيدّيك .. هوّد

أقشر طريق اللي مواريه هيّن
................ ما يسعفك تاخذ حذرك وتزوَّد

صالح العبدالكريم
07-28-2010, 09:15 PM
لا جزا الله الشعر خير ومسرّه
.............. اليا هِنا وقّفت .. يكفيني مغثّه

عمري ما حسيت بإحساس المضرّه
............. لين طحت وطيحت المهموم رثّه

الزمن لو ينأمن بالطيب شرّه
.............. ما يخلّي نابض الخفّاق جثـّه !!

صالح العبدالكريم
07-28-2010, 09:16 PM
يا زميل الحرف
لو كل السوالف في الهوى تُعتاد
ما مشينا للقا مقدار أصبع
ولا تعكزنا بعاد !؟
حاول :
إنّك ترمي نفسك للسما
وإلاّ حاول :
يدخل بصدرك براد
راح تلقى بكل بساطه
إن أحلام البشر
مثل أحلام الشجر
ما تبي تيبس
ولا حتى تبي تتقطّع

وبين هالفرقين فرق
لا عرفته
جمّع ظنونك
وفلسف لك بلاد !!

صالح العبدالكريم
07-28-2010, 09:16 PM
سلّمت عمرك للملام وأنت مو راعي صبر
.............. لا ترجع تفرّك يديك وتشتكي كثر الملام

النور واضح وأنت ما طقّيت يا الغالي خبر
........... وإلاّ أجل فيه شخص عاقل مثلك يخاوي الظلام

يا صاحبي والناس ماهي ناس والدنيا عبر
............. صدّقني كلاً راح يقطّع جلدك بسوط الكلام

خذها نصيحه : همّك اليا ابطى بتفكيرك كبر
............ بس لا أعتبرته رغم كبره تافه تعيش بسلام !!

صالح العبدالكريم
07-28-2010, 09:17 PM
يعني مضت كل هالسنين بعمري ما كنّه مضت
.................... وما كنّي يا ربي بيدّي دافن ٍ أوجع قبور

يا كثر ما رحت آتحرى أشياء نكهتها قضت
.................. وأحاول أخلق للحنين أجساد وأعمار وشعور

أحيان أحس أن الليالي لا انفقد غالي فضت
.................... وأحيان ما ودّي أحس بشي يملاني كسور !!

صالح العبدالكريم
07-28-2010, 09:18 PM
يقولون الحقه دامه يحبّك والهوى ذبّاح
................. وانا اقول المدى غمّض عيونه والمفارق زين

صحيح اللي يقول الطفل لا يقرب يديه سلاح
................... مهو من نيّته لكن غشيم وطلقته بالعين

أجل قلبي فتحته له ، يبيني اسلّمه المفتاح
.................. عشان ان طقّت براسه قفله وأختفى بعدين

وأنا ما عاد في صدري مكان ٍ ما لحقه جراح
..................... ولا ربي فرقني عن بقـيّة خلقه بقلبين !!

صالح العبدالكريم
07-28-2010, 09:18 PM
ما دمت ما تعرف غلاك إلاّ بغيابك
وما تبي حتى تطمّني عليك
ليه جيت !
وليه علّمت السوالف تحتريك !؟
وأنت تدري وش لك بقلبي مكانه
وإنّي رغم البعد سااااكت
وما نطقت بأي كلمه
بس قلّي بكل أمانه
ليه غبت
وشاللي جابك !

جاي تحييني بحضورك كم يوم
وباقي أيامي تموّتني بغيابك !!

الله يستر
لا يكون إحساسي هالمرّه صحيح
شفني ما صدّقت أعدّي أخطاءك الأولى
عشان تعوّد وتخطي و تصيح
تدري من وشّو أخاف
صرت أخاف وربي أصدق في كلامي
في إهتمامي
فكل شي ممكن يخلّيني أقدّم طيبتي
وأنطعن منّك وأطيح !

يا أنت
وأكثر ما جمعني فيك كلك
............ ما جمعني فيك شي أحدده

يا تروح بحالك والله يحلّك
........... يا تجي والجرح دين وسدده

وأنت كيفك !!
خذني منّي
ولاّ إتركني معاي
ورتّب أيام الحنين براحتك
وقد ما اقدر برتّبني لمساي
وموب شرط إنّي أكون الليله ضيفك
لـ أنّي مو محتااااج أزعل كل مرّه
ويقعد يراضيني طيفك !

يا قليل الوصل
والتحنان جارح
يا مشوّه بي ملامح
وأنا أكثر شخص خطّاك الدروب
خطوه .. خطوه
خطوه .. خطوه
صرت تكبر بين إيديي
وعلّمك صدري تذوب

يعني ما كنّا نسولف عن بعضنا للثواني
عن دواعي إمتنانك
أو دواعي إمتناني
عن مدينه ما مليناها لقا
بس مليناها أماني

يا شبيه الشمس
إن قربت منك إحترقت
وإن بعدت شوي تتجمّد ضلوعي
وأنا بين إثنينهم تلقاني واقف
شخص أبعد من بعد باكر
ولكن إنجبر يرجع لأمس
وأنت حدّك لين أمس
صعبه ترجع الأولاني
اللي فجأه
دون ما أدري دخلني
فرّغني من نفسي وملاني
يوم كان العشق حاجه تفضح العشّاق
لو شوارعهم تبيع الليل للظلمة
لو " أحبّك " في نظر هالناس كلمه
وفي نظرهم شي ثاني !!

والله يستر
لا يكون إحساسي هالمرّه صحيح !؟

صالح العبدالكريم
07-28-2010, 09:19 PM
عمري ما فكّرت أشيل بصدري وإلاّ اخبّي
.................. ولو يضيق الصدر القى بالنهايه دبره

إلاّ إنت ادعي عليك وينتقم لي ربّي
................. كثر ما تحكي بظهري والحكي يا كبره

يعني أمّا إنّي اسلّم أو تطيح بسبّي
................... ياخي الله لا يسلّم بك مغزّ الأبره !

صالح العبدالكريم
07-28-2010, 09:20 PM
الصمت حكمه وأكثر القول محسوب
................ لا صرت بين الناس سيّد مكانك

صالح العبدالكريم
07-28-2010, 09:20 PM
ما سألتك : ليه عنّي ما سألت ؟!
.......... خايف أنّي / أحرجك و" أقتل " سؤالي "

رغم هذا تصدّق أني ( ما زعلت ) !
............ ما أبي ينقص غلاك وإنت - غالي !!

صالح العبدالكريم
07-28-2010, 09:21 PM
مو كل ضيقه لازم انّه تكون من : موقف وناس
..................... الأغلب تمرّك كذا .. من دون حاجه حاصله !

والليله .. أكثر ليله سوء اخلاقها جت بالمقاس
..................... أحاول اتبسّم .. ونفسي براس خشمي واصله !

ما رحت افكّر بالحياة وما حوت .. لنـّه طفاس
..................... والشخص منّا لا بغاله شي .. يقدر ياصله !

بس البلا لا صار ضيقك واطي .. متبلّد حواس
................... لا دك صدرك .. ما عطالك فرصه حتى تفاصله !!

صالح العبدالكريم
07-28-2010, 09:22 PM
والله انّك بالغلا ما يشبهك إلا الرياض
................... كيف وانت اللّي سكنتك مثلها من خَـْلقتي

من عرفتك ما عرفت لنيتي غير البياض
...................وانا من قبلك تـضيع بوسط جوفي نيتي

كل عرق ٍ بي تشرّب من حنانك لين فاض
................... بالغلا،واصبحت اشوفك في ملامح دنيتي

الله يحلك حبيبي لو تورّدني حياض
................... المنية , كـنّي آرد في روابي جـنـتي

من ربى بالنار ما هو حاسب ٍ لادنى شواظ
................. ومن عطى للطيب عمره صار في ربعه فتي

وانت يا اللي في خفوقي لك مخاليف و فياض
.................... تدري انّي بحر عـشقٍ لو تغوص بغبتي

مير مالي حظ يجدي بالعطا الا وناض
................... في سماي ايلين تمطـر من غليله دمعتي

عن خطا الايام تكفى يا هوى بالي تغاض
................... دام ما للوصل درب الا مشت له خطوتي

وان بغيت إلا تقاضى هذا انا يمّك تقاض
................ وشرهـتك باللّي يقول ارفق علي يا عزوتي

سوّ ما يرضيك لكن ان لمحت القلب جاض
.................... انتبه يمكن نسـيت انك تمالح نـخوتي

المشاعر لو توصّــف حالهـا للبعد هـاض
..................... لكن الايام عـزّت عـن عـذابك عـزتي

من كثر ماني احبك قمت اسولف للرياض
..................... عنك من اول عـيونك لين آخر غـربتي !!

صالح العبدالكريم
07-28-2010, 09:23 PM
ما كنت اظن .. دروبنا .. للمفارق
........ وما كنت .. اظنّه ماسكه .. يحتريني


اول نهار .. لبعدنا .. كان حارق
....... لاني ابيه .. وادري .. انّـه .. يبيـني


العشق سجن ٍ .. لو تحالاه .. سارق
....... يبطي يتمتم :" لو حنيـنه .. حنيني "


كل ما يبْس غصن .. آتخيله وارق
........ خايف تشقق .. من يباسه .. يديني


كم لي وانا ارفع .. للنوايا .. بيارق
....... وكم لي وانا اضوي لليالي.. جبيني

يا ليتني .. في ما توقعت .. بارق
........ واعرف متى ! بيشيّب الشوق فيني !؟


عجزت افسّر وش بالأحداق غارق
....... ماهي .. بقصة دمع .. تخفيه عيني !


مثله .. مثل : رمح ٍ بالأضلاع زارق
...... عطيته صدري .. وما عطيته ضنيني


كان الوحيد اللي عن الناس فارق
...... لانه الوحيد .. اللي قدر .. يحتويني !

موت الألم : لا صحت بأذن المفارق
...... ضاقت عليك الأرض .. يومك تجيني ؟

صالح العبدالكريم
07-28-2010, 09:25 PM
صدّقني ماني جالس اكتب عشانك
.................... بكل بساطه جالس اكتب عشاني !

إن كنت ناوي صدق تكسب رهانك
..................... وتشدّني لك لين تقلب كياني

خلّك طبيعي .. لا تعلّي مكانك
..................... واحسب حسابك : لو زهتك الأماني

إن العمر لو جدت له بأمتنانك
..................... مصيره يمسح فيك ظهر الثواني

لا تنتقص قدر القريب بزمانك
..................... أو تـاكل بلحم البعيد بزماني

والله لو انّي اموت موت بثمانك
...................... وأحس شوقي لو تغيب يغشاني

اهون علي انّك تسكّر اذانك
...................... ولا انّي اسمع حكي يربط لساني

واليا قسيت وعامل الوقت خانك
...................... ونويت ترجع صاحبي الأولاني

ماني من اللي لا تزيعل اهانك
....................... صدري وسيع ولو بشيل يعصاني

خلني أعيش بحب يعكس حنانك
....................... وأبشر بـ كلّي ماهو بس بحناني

كانك تبي تقدير حبّك وشانك
....................... أحرص على تقدير حبّي وشاني !

صالح العبدالكريم
07-28-2010, 09:26 PM
ضميني يا يمّه .. وحطّي الغطا فوق الغطا
....................... الليله ليلة موت .. وربي كل جسمي ينتفض

الفقد يمرض صح يمّه .. لا تقوليلي خطا
................. وإلا أجل كيف الحراره تزيد .. وضغطي ينخفض

حتى لو اني ما لقيت من الحنين إلا البطا
...................... لكن لقيت ان الضلوع تهز قدري وأنرفض

طمّعت قلبي بالحكي .. وأشقيت عيني بالعطا
........................ وأثر الحقايق لا خذت له وقت صعبه تنلفظ

والحين أصمّ أذني براحة يدي وأدف الخُطا
....................... واردد : الله لا يرد الشعر .. وجسمي ينتفض !!

صالح العبدالكريم
07-28-2010, 09:26 PM
يا صباح العافيه والنور يا دقـّوسه
................... يا صباح الشوق وأكمام السما واحضاني

يا لذيذه لا كشختي والأماني حوسه
.................... ما بقى بالأرض غيرك يستحق جناني

لأني أوّل من رسم للريح صوت البوسه
...................... ولأنك أجمل من دفن ريق المسا بلساني !

صالح العبدالكريم
07-28-2010, 09:27 PM
قوليلي والله هالخطا ما اعوده
............... وإن عدتّه مرّه ثانيه خمّني بكَف (:

والكَف في شرع المحبّين زوده :
............... إنّه شبيه البوسه او يمكن الطف

ياللي كبرتي عن المراييل كوده
............... يزهى عليك العمر ياشيخة الصف

بردت ضلوعي خففي ذا البروده
................. وإلا اتركيني مع نواياك التف

ما كنتي يومك تعشقيني محدوده
.............. وما كنت يومي اعشقك ناوي انحف

بعض الغلا لا صار شكّه يقوده
............... الكل منّا بيمرض .. وصعبه نخف

يا تاركتلي من الهدايا وعوده
................ من يوم فرقانا وانا عيني ترف !

صالح العبدالكريم
07-28-2010, 09:28 PM
حبيبي آسف توّي أصحى من النوم
............................ غصب ٍ علي موعد لقانا تكنسل

تدري من أسبوع وأنا أنطر اليوم
........................... أثر الوعد من بين الأهداب ينسل

صالح العبدالكريم
07-28-2010, 09:29 PM
الألم :
بس الألم قدّر وفاي
يوم جا يسألني عنّي ..!

صرت احبه :
لنّي لا جيت اشتكي له
صعبه يخلف فيني ظنـّي
ودايم يوقـّف معاي !

كنت اقول :
الوقت صعب يحدّني
إنّي أقفل يوم بابي
إنّي أذبحني بغيابي
إنّي احزن
لين احزن
لين احزن
لين احرق ما بقابي
والقى نفسي .. ضدّني ..!

وأثر كل اللي حسبته
مو صحيح
وإلا اجل آصلك طيـّب
تردّني لنفسي .. جريح ..!

صالح العبدالكريم
07-28-2010, 09:30 PM
فاقد حبيب ولو عيوني يقرّن
..................... ما قر ّ قلب ٍ صارع البعد بإحساس

من يوم جرحي سبعة ايام مرّن
...................... وآنا ارد هموم صدري عن الناس

كل ما سليت آحس شي ٍ يجرّن
...................... وأقوم اجرّ من الوجع كل هوجاس

وأنا اللي كنت أحسبه باكر يبرّن
...................... من كثر ما شلته وأنا عاصب الراس

مرّات أحس ايام عمري يفرّن
....................... واقول وشوله التعب دامني حاس

ومرّات اطرّي أشيا غصب يتطرّن
........................ بعضه يفرّح وأكثره هم وأتعاس

ما استـْعيب ايام الغلا لا تعرّن
........................ لنّه أنقسم ما بين قلبي و الأنفاس

استـْعيب انّه يوم عزّم يحرّن
...................... وبكل بساطه عدّني : أبعد الناس !

صالح العبدالكريم
07-28-2010, 09:31 PM
ترفّق يا خلف طيي
.............. كسرت أصابع ايديي

لجل ما أذخر بحاجه
.............. كبيره ولو صغر شيي

توقّعتك قبل لا القاك
............... ولقيتك من حُسن غيي

وأنا اللي ما سعى للحب
............... زمن مرّ وأنا أعيي

ولكن مدري شلون أنت
............... قدر قلبي لك يحيي

صحيح تحبّني واجد
............... ولكن مو أبد زيي

أنا وصّلت في فتره
............... أشوف الموت متهيي

ولو كل ٍ خذاله درب
.............. مصيرك يا بعد حيي

تشوف وجيه كل الناس
.............. وتذكر وجهي من ضيي

لأنك شمس ولو تسطع
.............. يظلّ السر في فيي !!

صالح العبدالكريم
07-28-2010, 09:33 PM
كثيره هي جروح القلب .. لا تحتس من ذنبي
.................. تجمل دامي أغلى من عرفت .. بسيرة ذنوبك

عظيم الوجد لو يخفى عليك شلون جنن بي
...............تبصّر بين " نهتات الكلام " و " عاتي هبوبك "

رسمتك بين جفنين المساء ترويحة تنبي :
.................بشي ٍ يفهق دروب .. حرمتني شوفة دروبك

وإذا ودّك تشوف بجد عيونك وش يسوّن بي
.................أبد خل الهدب يسرح دقيقه .. وأنس محبوبك

ح ـبيبي والجروح اللي إلى حولت يرقن بي
................حشى ما ينثني عزمي .. ولو فتّقت عذروبك

تعرف إني إلى من طحت تايه وأوجعت جنبي
...............هموم الوقت .. ابتغيّب عن الدنيا ورى ثوبك

ترى واللي خلق زينك وخلى الشوق يسكن بي
.............كثر ما قلت أح ـبك موووت بدى يتعبني أسلوبك

مدامك قلت : أنا قبرك .. عساك اليوم تدفن بي
.............وتشوف شكثر أنا ضحيت لين أقصتني ذنوبك ..!!

صالح العبدالكريم
07-28-2010, 09:34 PM
صرت أخاف
إن القدر.. يـ اخ ـذك منّي

وأنا أدري بك ..
تموت ..
ولا تغيب

ودّي أبكي ..
ليييين ما ينثرك ظني
ودي أنسى ..
لين ما أشوفك قريب ..!

صالح العبدالكريم
07-28-2010, 09:35 PM
قلبت راسي الله يقلب راسك
...................... توّك تجي يومي تركت الطيش !

تدري وش اللي شدني بأحساسك
...................... انّه خذاني وما سألتك ليش ؟

قلبي تراه اليا تعلّق حاسك
...................... يعشق وتنبض غيرته و يشيش !

لا يغرّك إنّي عاقل ومتماسك
...................... يدبي جنوني في الجسد بشويش !!

الله يخلّي لك حبيبي ناسك
....................... أعطيك قلبي بشرط !؟



















إنّه يعيش !!

صالح العبدالكريم
07-28-2010, 09:36 PM
صدقني :

أن جمال الحياة في العطاء لا في الأخذ
وأنظر من حولك كم من الأشخاص الذين اخذو كيف اصبحو يضيقون ذرعاً بأنفسهم حال إستذكار صور من الماضي ويجدو بأنهم لم يقدموا شيء ، حتى وإن أُصبت بشيء من الألم إن رأيت بأن ما تفعله لا يثمر بأعين الآخرين فألمك يكبر ويكبر ويكبر حتى يصبح شخص آخر يسكنك بسبب أنك أكبرت من الفعل ولم تكبر من النيّه في الفعل ، وأنظر للأمور دائماً في حال إنتهاء حياة صغيره بجزئياتها داخل الحياة العامّه والتي يشاطرك بها الناس أجمعين والمُشاطره قد لا تكون التقاء معرفي بقدر ما تكون ملاحظة إنفعالات وتصرفات ظاهرة فأجعلها اكثر زهواً وثق بأن المرء الصالح عندما يقلّب كفّيه فيجد انه من الذين يعطون بكامل إبتسامتهم ولا يلحقون ذلك مناً ولا أذى تزيد مساحة الرضا عن ما يجري بداخله وتنحسر مساحات الضيق بعينيه وإن أتسعت بأعين الآخرين ..
دائماً محاولة تسليط الضوء على مسأله حياتيه يكون أكثر تأثيراً على النفس ، كيف إن كان ذلك بعمق مختلف الجوانب متساوي القُدره إن اردنا ذلك , فعندما تُفند الأيام ملامح الآخرين فتنظر من علو يكشف ما على الأرض كاملة فتجد أن الناس باتو يفهمون أن الحياة بالأخذ لا بالعطاء وهذا ما يجعلهم يدورون في كُره كبيره روؤسهم عند أرجلهم ليعودو كما كانو عليه في بطون أمهاتهم شكلاً ومضموناً ..!

صالح العبدالكريم
07-28-2010, 09:37 PM
من الأخير !؟
ان كان تغليني صحيح
تكفى تكفى طالبك
فكني من قول وشفي صوتك
أو أسفل عيونك تنهّادة سواد
أو نحف جسمك كل ما دبدبت زاد
انا والله مو بلاي بنفسي
إلاّ كل بلاي بأسألتك
من صرت اسمعها فلا عيّنت خير !

يا شين صوتي منقطع
وايديني للرحّل تصيح
يا شين اشوف وجيههم قدّامي
وما تبغى أطيح !
قاعد تبربر : الصقور صقور
وأبرك لحملك تشيله
وخلّك لحملك بعير
وأعتبر ما طاف طاف
وإن فالباقي كثير !

صدّعت في راسي عسى الله يصدّع براسك
يعني بربك
انا اوّل واحد تشوفه متضايق
طب كل هالعالم تضايق
يعني شسوي بنفسي اتحمّس وأطير !؟

بعلّمك حاجه من احزان الحقيقه
إرم كل اللي سمعته بالمجالس
واللي قريته بالكتب
وأسمعني !؟

إن شفت لك شخص ٍ متعوّد يبلع همومه بصمت
ويقلقه أحيان ريقه
لاااا تسأله
لاااا تسأله
لاااا تسأله
يمكن يغص بدمعه أكبر من كلامك
الحزن يُبصر
وإنت يا الفاهم ضرير !!

صالح العبدالكريم
07-28-2010, 09:38 PM
لا تسأل الغير يا خلّي
................ إن كنت للحين في بالي

تعال يا المنتفخ قلّي
................ وتعرفني إنّي على فالي

لا تبرطم وأنشقك كلّي
................ ولا تسوّي عكروت وتلالي

اقعد الفـّك على ظلّي
................. وأجننك انت وظلالي

ما بالكبـِر فود يا ملّي
................. لوّك عسل صاحبك حالي

دام الغلا باين بحلّي
.................. خلّه يبيّن بترحالي

لا تقول في رجعتي ذلّي
................... الذل : تسأل ورى غالي !!

صالح العبدالكريم
07-28-2010, 09:41 PM
للأقدام : خطوات قدر ..
لم تكن الأيام سوى تعاقب .. ليل / نهار .. وذكريات نازله ..!
كُتبت في .. / 2 / 1421 هـ .. موجهه لأخي بندر
وبقي صداها عالقاً " بتقاسيم الوجه " ..






يا عسى جفن ٍ تقزوى لحظة النوم الهنيّه
.............. يلتقي باللّي طيوفه بين خدّه و المخدّه

إمش بالقاع وتثيقل لو على الوضحا منيّه
............. لا رحم ربي نفوس ٍ ما لها بالطيب شدّه

ولعنبوها من كبود ٍ ما بها مرّ و حميّه
............. كان ما تاقف بماقف يتعب الملتاع ردّه

يا ربيع القلب هذي دنيتك دنيا دنيّه
............ وآعذاب اللّي تحدّه للردى و الطيب حدّه

سلوتي هالوقت محدٍ يبتسم من طيب نيّه
........... كود ما يلقى بآخر ضحكته ضلع ٍ يجدّه

الزمن غدار وأهله يا رفيق الدرب زيـّه
............دامـنا صرنا نميّز طاهر القلب ونعدّه

لو حسبنا للحسايف في دروب المقدريّه
............كان ما كانت غميظه طيحت اللّي باح سدّه !

ولو عرفنا للدروب المقفيه في غير جيّه
............ كان ما متنا وباقي في سنين العمر مدّه !

ولو بذرنا لليالي في زمان الجاهلـيّه
............ كان ما جانا نهار ٍ يستوي مزحه بجدّه !

أبتسم للناس وأغضي وأكتب الخيره خفيّه
............واجمع دموع اليتامى في وسط عين ٍ مصدّه

وأكتم الآهات وأخفي في ضلوعي نار حيّه
..........والظروف أصعب على اللّي طيّب جروحه بندّه

كل هالدنيا خطايا ونبتت إبن آدم خطيّه
............ وآهني اللّي لقاله بالفرح ثوب ٍ يقدّه

آييييه يا نزف المشاعر ما بقى فيني بقيـّه
............. كافي إني صرت ندّ لحاجة ٍ ماني بندّه !؟

جار زيف الوقت وأسرف في ملذاته وغيـّه
............. في وجه رجال ٍ أمسى يحظن احزانه بيدّه

الهقاوي ما تجمـّل لو قضبته من يديّه
............ دام عمر الصبر غلّق قي رجا روحه وردّه

البلا بإني عشقت سلومنا غصب ٍ عليـّه
............ بدوي والنفس تشره لو بدى علم ٍ يضدّه

ماني اللّي يسوق علمه بالحروف الابجديّه
.............. دايم ٍ فعلي وربي يسبق أقوالي مـردّه

والعزى بإني كبرت اليوم وشروكي قويّه
............ ما تغيب وجيه ناس ٍ أشرقت طيب ومودّه ..!

صالح العبدالكريم
07-28-2010, 09:42 PM
ما عاد تفرق : خانني بعد ما رحت !؟
...................... وإلا انّه يحكي عن غلاتي لناسه !؟

ياشيخ حتى صحّتي تعبت وطحت
..................... واللّي حصلّي كلّه من تحت راسه !!

اصيح بـ إذنه اعقل وكنّي ما صحت
...................... لأتفه سبب .. هاللي بنيناه حاسه ..!!

صالح العبدالكريم
07-28-2010, 09:44 PM
ليت الألم يسوى أو الشوق يسوى !
............. واختار واحد منهْم اليوم وارتاح !

بس الصحيح إني فلا عدت أقوى !
........... كنّي غديت من التعب أضحك جراح !

ماكنت اظن ..
ايدي من الوقت .
تلوى !

وامسك لحم
وجهي .. وانا
اتحسسهـ طاح !!

صالح العبدالكريم
07-28-2010, 09:47 PM
كثيراً ما نذهب إلى إعادة إستنطاق وجوه و ملامح لم يغيبها حاجز الصوت وبقيت همساتها عالقه في أقصى الاُذن ومكانتها في أعمق نقطه في القلب فالأطفال هم القادرين على تفتيت هذا الكون إذا ما كان لعشقهم ولبراءتهم من تدوير مشاعر و إبتسامات خالده لا تبرح مكان بالجسد إلا وأوقعت عليه الايمان المغلظه بـ الارتعاش ..!
من واقع تجربة الغير .. كُتبت ..!
ليست إلا اُمً فقدت أغلى ما ملكت في هذه الحياة فقدت طفلتها ألتي منّ الله عليها بها ومن ثم مشيئته سبحانه قبضة روحها ولم تكمل أعوام العبث كامله فقد إبتُليت بأمراض متلاحقه وبقيت إبتسامتها تنطق بوجع يراه الغير براءه و شرود ذهني ..؟
لا يعلم بذلك سوى الام التي مضت لتضمّد جراحها بالملح تريد أن تُحرق نفسها بالالم وتشاطر إبنتها ما كانت تعانيه .. !

فلئكن مكانك ِ أيتها المكلومه طلباً منك ِ لي تحديداً .. ومشاركة الألم منّي محبة ً وإخاء ً!
يا طفلتي :
إنتهك المرض جسدك في الوقت الذي كنتِ تستعدين لان تطلقي عينيك وثغرك للفضاء وتشاغبي العصافير التي كانت تقف على النافذه لتطمئن عليك ِ كل صباح كانت تشعر كل يوم أنك ِ لن تـُكملي هذه السنين بسلام فقد ذهب القدر بعلاجك إلى مكان أجهله وليس لي قدره على تحمل ملاحقته فأنا مؤمنه بقضاء الله وقدره ..
كنت عندما أراك ِ خلدتي إلى النوم أضع راسي على صدرك كل ساعه بل كل دقيقه كنت أستمع إلى نبضك أخاف من أن لا تتنفسي و أختنق بك ِ وأموت ..!
كنت أهرب لملابسك ِ والملمها علي أن أشعر بأنك ِ باقيه .. باقيه ..
أذهب لغسلها وكويها والدموع تتساقط من عيني أُحس بأني سأموت بأي لحظه من كثرة إختناقي بك ِ،كنت أفعل كل ذلك لشيء واحد فقط أن يرأف الله بحالي ويبقيك ِ لي فأنا لم يكرمني الله بغيرك .. ؟
أبنتي وكل ما في هذا الكون يـُشبـُهك ِ حتى أنا عندما أنظر إلى المرآه أجدني إستقطعت منك ِ الشي الكثير فلم يخلقني الله من قبل بهذه الصوره .. كل شيء من حبُك ِ أصبح أنت ِ ..!؟
يكفيني أن التقيت بك ِ في هذه الدنيا حتى وأن قدرالله وذهبتي عنها فسوف يبقى كل شيء منك ِ بمكانه وسأرحل معك ِ فأنت ِ سكني ..!
عندما أراك مبتسمه في زاوية الغرفه والناس ينظرون لك ِ أقول في نفسي لا يعلمون بأن هذه الابتسامه إبتسامة الم أبتسامه لاشعور قد صنعها الله لها ليشعر الاخرون بـ براءه قد خلت من قبلها الامم براءه بوجه ملائكي سبحان من كتب لك ِ هذا الخلق و أحسن صنعه ..!
كنت أذهب لانجز أعمالي وأنا بجانبك .. كل شيء أريد عمله .. نعمله سوياً ..اليس كذلك ..؟
هل تذكرين عندما كنت أحضر أوراق العنب لـ لفها .. كنت ِ تشاغبيني كثيراً عند حشوها كنت أضيق من كل شيء إلا أنتي .. لا أضيق منك ِ ابداً ..!
أحسست بك ِ أكثر تماسكاً في أيامك ِ الاخيره وكأنك ِ تريدين أن تخبرين الارض والسماء و الهواء تريدين أن تخبريهم بأنكِ قويه ولا تستسلمين للمرض ابداً وأني أمتلك أم ً صارعت الآمي وسهرت بدلاً عني ولم تقل يوماً للقدر أفً لك ..
كنت يا بنيتي خائفه جداً لا أعلم لماذا ؟
فأنتِ نهضتي بوقت أحسست بأنه لم يكن بطبيعة الحال جيد فهناك شيء تخفيه الليالي فسكت وأنا وجله ..!
في صباح الخميس نهضت ِ مبكراً على غير العاده ، فأنت كنت تستغرقين وقت أجمل في منامك فهو لايشعرك بـ الوجع ابداً ولا بمدى إتساع الجراح ..!
نهضت وإذا بك ِ تلعبين وأنتي تنظرين إلي بعين الرضا ، لم أشأ أن اُعكر صفو هذه اللحظات التي تعبثين بها فأردت أن اُكمل النوم قليلاً وإذا بصوتك ِ يشاغبني وكأنه لا يريدني أن أنام .. حاولت مراراً تكراراً لا فائده فأنت ِ مصره على أن أبقى أنظر اليك ِ ..
لم أكن أعلم بأنك ترتبين جسدك للرحيل وترتبين نظراتي لان أبقى على مضض وكل ما بداخلي اُنتزع لك ِ
كنت اُحس بأنكِ أردتي القول أن هناك من يشاركني جسدي يا امي ، هناك من تكور لهبه بداخلي فظل يجمع أعظائي ويحرقها ..
كنت اُحس .. اُقسم لك ِ بالله اللذي خلقك ِ من تراب وقبضك ِ من ألم أن لو كان غير الله من أراد أخذك ِلئهون علي أن يقطّع جسدي أجزاء صغيره ولا يأخذك ِ مني ..!
الحمد لله على كل حال يا أبنتي لا تخافي أنتي ذاهبه إلى من هو أرءف عليك ِ مني أنتي ذاهبه الى من بيده إزالة أوجاعك ِ وتخفيف ألمك ِ ..
أما كنت ِ سابقاً تقولين لي بحركة أجزائك ِ بأنك ِ أصبحتي قويه اليس من صفات الاقوياء عدم الخوف ..
إذاً إنتظريني فكلها أيام وإن طالت .. وأعود اليك ِ .. وأحضـُنـُك بجنات الخلد .. بأذنه سبحانه و تعالى ..!




لو جاني عقبك يابعد عمري عيال

........... تبقين أغلى وأصدق وأقرب شعور


وشله تخافي : كلها أيـامٍ قلال

......... والقاك بأذن الله كبرتي مع الحور ..!!

صالح العبدالكريم
07-28-2010, 09:51 PM
شتقول

عدها علي

شتقول : تغليني
................... يا انّك امرك عجيب .. وحالتك حاله !


في هالزمان انتبه .... لا تقول يمديني
................... ما تشوفني ناحل ٍ عودي من افعاله


شفني نصحتك .... مدامه بينك وبيني
.................. ما فيه عاقل ... يسابق بالخلا ظلاله !؟


والله شعورك وصلني ..... وجد يحييني
................. ومثلك : يشرّف غلاه ... ورقة اقواله


صعب آتغير ...... وأنا مقطوعه يدّيني
................. صعب آتحرّك ...... وأنا متجمّد إبّاله !!

هذاك ....... والله احب بسبته عيني
................ لأنه تحبّه ..... وقلبي يحفظ وصاله


رغم انّه أعدم كثير أشياء .. تعنيني
................ إلا انّي ابقى : على ذكراه وأطلاله


تصدّق ..!؟ إنّي تعبت ومعرف شفيني
............... معاد اصدّق غلا المغلين .. وأسعاله !


خذها نصيحة أخو ... والشاهد سنيني
.............. مدام توّك .. صغير ، وطيّب ، وداله :


خلّك حريص ....... وأنا ارجوك تعفيني
.............. بذا الوقت : كلً يعيش لنفسه احلاله .!!

صالح العبدالكريم
07-28-2010, 09:53 PM
تعـبت أجمّع جروحي ..
ثم أوزّعها
على ضلوعي .. وألآقي بعضها
غالي ..!!!

صالح العبدالكريم
07-28-2010, 09:54 PM
الأماني جس نبض و الحقايق بيّـنه
........................ والحكي جرح ٍ خذيت قضاي منّه بسهري

علمي بنفسي اقول كل غلطه هيّنه
........................ أثرها جتني جميع قبل احسّب لظهري

ليتني صدّيت دامه مطيّنه مطيّنه
........................ ما تركت الغبن ياكل من عزومي وقهري

من غبائي اعتقدت ان القلوب حنيّنه
....................... غلطتي يومي اسوق الطيب وأكسر مجهري

الدروب اللي حسبت خطاي فيها ليّنه
..................... صارت أقسى في عيوني من صواديف دهري

جِعل من حط الخفوق وكبريائه عيّنه
....................... يشرب من اللي شربته لين يرويه نهري

وين اولّي من ذنوبي والعواقب ديّنه
...................... والشتاء يومه تقرّس ماتت الوان زهري

من شهر انده وحولي الهقاوي متيّنه
....................... هيييييييييييه

يا هييييييييه ردّو

لين ما زل شهري !


وانا مالي غير نفسي والنوايا مزيّنه
........................ وآخر أحلام الطفوله يوم ازيّن مظهري

عزتي للي همومه بالدموع تديّنه
........................ لا وقع من طوله وآخر قولته آآآخ ظهري !!

صالح العبدالكريم
07-28-2010, 09:54 PM
وانا اتحدث عن الصباحات دوماً
بودّي ان افقد الوعي طيلة اليوم وافيق صباحاً فقط

فهو نقي جداً و واضح
يبقى هو كما هو .. لا يتغيّر ابداً !

وددت لو اني املك لغة العصافير حقاً
او وهبني الله ان اُكلم نسائم الصبح الباكره .. اتجاذب الحديث معهما
يعلم الله اني اتوق للتعرف على هاتين الشخصيتين

يُخيّل لي دوماً اني اُعطيت هذه الأمنيه
فأبدا اعيش " الدور " اسرح بعيداً بعيداً حيث لا نهايه
ابدأ بوضع نفسي في مكان ٍ ما .. واراقبني من بعيد
ماذا عساي ان اخرج به من ذلك

لا اريد " براءة اختراع "
بقدر ما اريد براءه فقط !!

صالح العبدالكريم
07-28-2010, 09:57 PM
لا ترمّز لجرحك وأنثره للهبايب
.................... ولك علي اني ابقى قد مقدر صريح

يا حبيب الخفوق ولا لفتك النوايب
................... فكّر شلون تاقف وّين ناوي تطيح

الليالي وسيعة بال عند الحبايب
.................. اصحَ تفرش سهرك وانت قلبك جريح

يا كثر ما حلمنا بالمطر والسحايب
.................... ويا كثر ما صحينا وما قدرنا نصيح !!

صالح العبدالكريم
07-28-2010, 09:58 PM
احبك

كثر مـا للـيل صوت
وسلهمه
واشواق
وكثر ما خانني احساسي !

وكثر ما للصباح طيور
تسكن داخل الاعماق
وتطيّرها لك انفاسي .!

تعالي يا بعـد روحي
ترى مليت من هالناس
تعالي داوي جروحي
قـبل لا يحـتويني الياس

وربك
شوفي بصدري ضلوع
ترتجف تدعيك
ولا تخافـين منظرها
لو ان البعد كسّرها
بتبقى قادره تحمل بعضها
وترجع تدفيك ..!

صالح العبدالكريم
07-28-2010, 10:02 PM
من يقوووول

إن الرحيل اجساد بس ..!؟

لو فتح صدري لقى كلّه جروح

ولا قدر يحصي عدد

من غلاة اللي فقد

ورب موسى ما احسّه بس روح

لولا خوف الله

قلت بـ ايش احس ..!!

صالح العبدالكريم
07-28-2010, 10:02 PM
إن جا هلابه وإن تعدّى هلابه
................... ما هان قدره لو تهاون بفرقاه

ما اقول الاشياء في غيابه تشابه
................... يلعن ابو الاشياء اذا ماهي اشياه

العشق مثل الموت ونفس الغرابه
.................... حياة اُخرى تنكتب لك وتقراه

صعبه تكرّر لو تكرّر مُصابه
................... هذاني رجل وعيني تغورق بماه

ما كل سؤال بداخلي له إجابه
.................. يا كم سؤال يفتّ عظمي و أدراه

أهون على الإنسان يفقد صوابه
.................... ولا انّه يفقد واحد ٍ عاش جوّاه

والله احبّه احب لو ينحكا به
.................. ما ظل بعدي عاشق ٍ يترك أنثاه

والله ما جنّن عاشقه في غيابه
................. إلا انّه يسمع ضحكته داخل أحشاه !!

صالح العبدالكريم
07-28-2010, 10:03 PM
تحضُرين

والليل يسهر ُ تحت عينيك ِ
والشمس ُ تُشرق بوجنتيك ِ
حتى تشع ُ من الجبين ..!

اصبحت ُ ارقب كل خطوات الذهاب
وأرتدي سُبل الكلام
وفيك ِ تاريخ الثقافة
والوراقة ِ
ومنك ِ تأنيق السلام

وكأنك ِ النجم العلامة في السماء
لتهتدي فيه السنين


تحضُرين
يا مليحة الصبايا
يا إنعكاسات المرايا
يا شمعة ً بالثلج تضوي
يا قطعة الغيم
وريح الياسمين

يا أُغنيات الريح
والشوق الدفين

لا بأس إن صدق الحنين
فالقلب لا يخلو من الأحلام
والعين لا تخلو من التأبين !


ما كُنت ُ أصدق من كلامي الآن
لأنتقي لفظاً من الألفاظ
أو سحراً مبين

قد كُنتُ أحترف ُ الكتابةَ في النساء
حتى نفخت الصبح في رحم المساء
ولم اُحس بما كتبت

لمَ كذبت ..

أوَ تسألين !؟

قد أعزو ذلك أن كل قصائدي
لم تلامس سقف روحي
حتى وجدتك ِ تضحكين ..!

صالح العبدالكريم
07-28-2010, 10:05 PM
كان ذلك السائق الرجُل الشهم في إحدى الدول العربية
لم يكن حديث عابر بقدر ما كان يعبر الحديث ليصل لأبنائه














جددت جرح ٍ غافي ٍ يابو عوّاد
................. وأنا طبيعة جرحي لمثلك تزود

يا الشايب اللي يوقف عقالك حداد
................ على الزمن لو بيّن بضحكتك جود

انا اعرفك تقرا على حزنك اوراد
................ تخاف يضعف حيلك ومالك زنود

انت الضحيّه لا تنادو بالأحقاد
.................. وانت الوطن لوّك معتّر وملهود

تجيب من صلبك رجاجيل وأحفاد
................... وتعيش لكن عيشتك توجع كبود

وتموت داير بين الأردن وبغداد
.................. ومن شمال المملكه أصلك يعود

ابكتني والله غربتك والبكا زناد
................... يثوّر بعلبا هل العرف بارود

الناس تفسق يا الفقيّر بالأعياد
.................. ومثلك يدوّر لقمته بين الحدود !!

صالح العبدالكريم
07-28-2010, 10:06 PM
الورق ما كان مهرب لجل تحسبني هربت
.................... والقلم ما كان فكره لجل ادوّر بك خيال

يا كثر ما كنت ابعد واكتشف انك قربت
.................... مثل من ينوي البعاد وينتظر كلمة تعال

للأمانه كنت طيّب حيل لكنّك خربت
.................. وللأمانه كنت غالي حيل وأيامك وصال

تذكر آخر ليله قبل ارحل حبيبي وش شربت
................... جايز انّك ناسي بس عيونك بتنسى محال

كنت أشرب كل حرف بدمعتك ليني ضربت :
................... للزمن أقسى معاني وللوفا أصدق مثال .!!

صالح العبدالكريم
07-28-2010, 10:07 PM
الزمن لوحة شرف
علّقت الأيام فيها اشباهنا
وانزوت عنّا بطرف
علّمتنا كيف نفصخ طيبنا
ونلبس الدنيا مرض
علمتنا كيف يظهر شيبنا
ونقرب لبعض : لغرض ..!

يا هي هالدنيا دنيّه ومخجله
شف خطوط جباهنا
بتموت من ضحك : القرف !!؟

صالح العبدالكريم
07-28-2010, 10:09 PM
انا كلّي أسف كاني خْطيت بحقـك واذنبت
............. ترى لولا الغلا ما صاح جرحي و العذر واهـي


فتحت اقـصى المعاليق ولقيتك للحزن رتـّبت
............. معـاني فرحة اللقيا , وانا ما سـقت لك جاهي


انا تدري كثر ماني اعيش بحلمك ولا تبت
............... نسيت امسح بك دموع ٍ نثرهـا طرفك الساهي


طرقت لآخر نجـومـي مداي وليتني ما جبت
................ ضياها , يوم ما خفـّت سماي ولونها زاهـي


لك الله يا المشاعر من عرفـتك تكرهين السبت
............... عرفت انّه غدى غـير ولْو الاسـما عـلى ماهي


مشيت ولا قـدرت الا عـلى خطوه بها تغرّبت
............... عـن وجيه الملا واقفـيت اقول اشباهي اشباهي


عظيمه يا السنين اللّي نفتني للغرام وذبت
................ بها , لين انعدم بعضي وهو يستعطف اكراهي


ابد ما خلّـفـت غـير الملامح و النوايا كبت
.................. ولو جتني عـلى صدقي اببقى فـيك متباهي


ترى صدري عليك اوسع من الدنيا ولو جرّبت
.................. بتلقى كل ضلع يقـول عليك نهون بالله ِ !


بعد حي المسا قلّي وشاللي تستفيد ان غبت
............. انا ادري وش كثر تعشق طروق الملح بشفاهي


تعاااااااال
اشغلني بك قلبي وهـو يسأل ولا جاوبت
................ اخاف انّي اغـثّه لا درى بإن العتب راهـي


مدامي قلت لك اسف واقرّيت بخطاي وتـبت
.................. أجل خـل الزمـن يمشي مدامه عننا لاهـي !!

صالح العبدالكريم
07-28-2010, 10:11 PM
يا طفل ياللي كبرت ورحت بأشباهك لأمك
................... يا ليتها ما أعطتك نفس الملامح و المشي !!
الله يرحمها
الله يرحمها
الله يرحمها

الله يرحمها

ويرحم دمعي الغارق بهمّك
...................... الفقد يوجع يا بعد خالك وحزنه ينتشي !!


كل ما تجي من آخرك تركض وتبغاني اضمّك
..................... أحس اني لا فتحت يديني من طولي آغشي !!

صالح العبدالكريم
07-28-2010, 10:12 PM
تبغى الصراحه : شفني ميّت من الجوووع ؟
............... مهوب جوع البطن .. جوع المواصل !!

دعيت ربّك شوفتي .. وروّح اسبوع
............... وبعض الدعاوي ما تحقق و تاصل !

افاااا عليك يضيق صدرك بموضوع :
................ ما هو بيدّك .. وأنت طيّب و آصل

إستهد بالله .. ما أبي اسمع دموع
............... ملح الدموع يطق .. مثل المفاصل !

حتى لو انّك مضوي لجيتي شموع
................ مـو كل شي ٍ لا بغيناه حاصل

طعم السفر مرّ .. وخطاويّه وجوع
................ ترسم على ماطا الهواوي فواصل ..!

صالح العبدالكريم
07-28-2010, 10:13 PM
من يخونك بالمودّه صعب تبقى له وفي
............... وأنا ما خنت المودّه يوم خانتني الظروف

شرهتي ماهي على اللي لشوفة الجرح يحفي
............... خابر انّه لو وصلّه .. ما لقى شي ٍ يشوف

ادري انّه .. لو يزيّن هرجته عرقه هفي
.............. ويدري انّه .. لو يلمّع ما بقى منه معيوف

شرهتي والله على اللي اظهره لو ينكفي
............. وإن شكرني قلت مالي منّه .. ومالي معروف

مابي إلا الطيب يبقى .. وحق ربّي وشرفي
.............. يوم صار الطيّب أهبل .. والزمن مليان خوف

كل نار ٍ غير نار الظيم .. باكر تنطفي
.............. وكل مرٍ لا علق بـ الكبد .. يا عنك مخلوف

وكل نفس ٍ ما تقول لخبث نفسه أوقفي
.............. والله انّك تستحي من فعلها .. عند الضيوف

علّم اللي ما عرف للحين كيف مناكفي
.............. إنّي اللي لين وقّف .. ما شكى طول الوقوف

دام ما يبغون تمري .. بس يبغون سعفي
............... خلّهم يبنون عشـّه .. ولي أجر ظل الضعوف

والغنم لا قيل يالله جاك رزقك و أعلفي
.............. لا تظن إنّه بتوقف .. تنتظر منك الحلوف

والرجل عيب ٍ عليه إن بان يرجع يختفي
.............. إنشد اللي يوم عزّة موتته طاحت سيوف

أقدح من الراس علمي لين يوضح موقفي
.............. ولـ أخلط القولات لو بي من عمايلها صدوف

وعن مجالسة الوجيه السمحه ابداً ماكتفي
.............. ما اوفيه بدعاي لوني بالحرم اسعى واطوف

ومن تعبّث في سلومه .. لو جموعه تحتفي
.............. باكر يبرّق بفعله .. لا بدت تطري الحسوف

يا الليالي كان مالك غير شكواي .. أعرفي
.............. والله إنّي ما شكيتك .. يوم بدّتك الخشوف

جيت ولاّ علني ما جيت .. قومي صفّفي :
.............. باقي همومك .. ترى ما عدّت ابرّق بالوصوف

والنبيل اللي تعلّق بالهقاوي .. لا جفي
.............. مخطي لو رمّم جراحه .. وعاد للهقوه شغوف

ما بغيت آخذ كلامك .. وإن جبرتك أحلفي
............... أعرف انّك لو حلفتي .. قمت اسولف بالحلوف

بسهرك وإن جاك احد ٍ تحسبينه من طرفي
.............. اسألك بالله قولي مرّني و .. وجهه مخطوف

يمكن انّه : عن وطنه اللّي تربّى به نُفي
............... بس ما خان المودّه ... يوم خانته الظروف !؟

صالح العبدالكريم
07-28-2010, 10:15 PM
سرير لهفه .. وشمعتين .. وحُقن تفكير ومواجع
............... وشبّاك .. علـّق دمعة الخشيه.. يبيها ما تطيح !!


لوّنت وجه البخت ..مابي ينكشف ويصير فاجع
...............اثر البشر ..مثل الورق ..مرهونه احلامه بريح !


ادري بأن الوقت راح .. لو كذبت وقلت راجع
.............. الله يسامح .. كل غزّه بـ الجسد .. قامت تصيح !!


صحيح انك منكسر ياقلبي ..بس حاول تشاجع
.............. كم من عذول ٍ باع عمره .. لجل يلقاني جريح !


دام الهموم ابلغت .. افرق ما بينه بالمضاجع
.............. مابك مكان ٍ ما لمْسه الضيق .. وازراه المطيح ..!!

صالح العبدالكريم
07-28-2010, 10:15 PM
مرّه أجي من لهفتي ..
في مكانك
ومرّه .. أشوفك في مكاني
.. تجيني !!

من زود ما أحـس
بـ ولهك وحنانك
أخاف أنام ..
وما تضمّك يديني.. !

صالح العبدالكريم
07-28-2010, 10:18 PM
سأتخطى بعض الشواهد لأقول :
لن يحدث شيء لو قمت ذات صباح فوجدت احدى عينيك فارغه من الداخل ..
لا تقلق ابداً فقد تكون علقت بحلم ٍ ما وصحوت وهي باقيه معه !
سوف تعود لك .. بكل تأكيد .
ولكن بماذا تعود ؟
،، : لذلك اسبقت الحديث بتمام ما كان الحديث الأشمل به وأجمعت بك في انّه :
قد يكون على المُحب أن يتلبّس لمن أحب
دور الأب في تحجيم طابع الأمور وإتساعها
ودور الأم في خلق حنان كامل وخوف أجلّ و أنقى
ودور الأخ في ملامسة نقاط الحزن و الفرح
ودور الحبيب بجمع كل ما سبق كُلً على حده بأوقات متفرّقه ..!

في وقت ٍ نادى منادي ٍ من مكان ٍ بعيد .. وسمعه من في الأرض
ولم يحرّك إلا اوراق الشجر ..!
هل رأيت كيف أن حتى الصوت أو نبرته لم يخلّدان في عُرف الذكرى
بقي أن نعلّق الرداءه على شماعة روابط الأمكنه ..
حق للكتابه ان تفطّر عشرة قرّاء إذاً ..!

صالح العبدالكريم
07-28-2010, 10:19 PM
لمحتها تشعل من ابياتي حنين
................ وقريتها تنسخ من الشعر اسهله

بنت ٍ براءتها تغيض الياسمين
................. بنت ٍ لعب فيها هواها و عفله

والله ما اعرفها ولكن بي يقين
............. ان اكثر الأشياء الوضيعه تجهله

مرّات احسّه سابقه العمر بسنين
.............. لا جت تعيد اللي كتبت وتسأله :

إن كان باقي بالوجع رمية ذهين
.............. وإن كان باقي بالأمل طاري وله

ومرّات احسّه فارقه فرق الحزين
................ عن ضحكة العينين والونس وهله

ماكل من يقرا احاسيسك رزين
................. وما كل من فتّش سواليفك دله !!

صالح العبدالكريم
07-28-2010, 10:25 PM
وللحكم العسكري الصارم كُتبت s5
كان الحديث مع ام بندر حاضراً ومنشوراً
لا نشر الله لنا غسيل يوم القيامه s12







قالت الله خيرك ما بين قلبي و القلوب
...................... والزمن لو كان يسوى ما جهلنا وش نبي

قلت واللي يشتري بحكاية الليل الهروب
....................... اشهد ان الله عطاه رجول لكنه يحبي

كم نبيه لو تلامس كفه اطراف الغروب
....................... يدري انه لو يشح بدمعته لله غبي

الله ما بدل مصابيح السماء بشمع يذوب
...................... لجل ابدل تالي عمري راحتي بكثر تعبي

حدي اكتب شعر واخلق فكره واحنن دروب
....................... بس لاجت للحقيقه عندي في بيتي ظبي

صالح العبدالكريم
07-28-2010, 10:29 PM
أوَكُلَّما أسهبتَ في طلبِ المُنى
.................. أيْقـَنْتَ أنّك قَدْ طَلبتَ سُؤالي

فالشعرُ أرواحٌ مجندةُ الهوَى
.............. وخصال ُ قلبُكَ في الحنين ِ خِصَالي

يامن ملكْت مع السنينِ جوانحي
................... ما عُدتُ في المتغيراتِ أُبَالي

هبْ أن قلْْبي لا يَزَالُ مُراغماً
................... هبْ أن روحَك لا تملُ وِصَالِي

ما كلُّ ما نَرْنُو اليٌه ِ بصائرٌ
................. حتى وإن عصفَ الحديث ُ بحَالي

يا صاحباً الفَيْت ُرُؤْيَاه ُ ضَنَى
.................. ومِثـَال ُ ذلك في الرؤَى أوْحَاليِ :

أن الحياةَ إذا تباعدَت الخُطى
................... تعبيرُ مَنْ قَبـِل َ العزَاء َ بِغالِي !!

صالح العبدالكريم
07-28-2010, 10:31 PM
مدري خيال اللي حصل ولاّ حقيقه غايبه
........ أنّي أشوف الكون يعكس صورة أشباهك عليك

يا فاتنه والحسن يومه شاف عيني رايبه
........ بالدمع من فيض العشق وقّف يشاورلك أبيك

دام المشاعر كلّها بشفاك صـارت ذايبه
........ وشلون أبستر هالغلا وأسكت وشوقي يحتريك .!

أقصر معانيك اللقـا وأطول حدودي سايبه
........ وأوضح تفاكير المسا أنفاس ملــّت تهتديك

شفتك مسافه والفضا رحب وحظوظي خايبه
......... وأقسى تجاعيد السهر كذبه تحِس أحيان فيك

كن الخطاوي لغير دربك من أثرها تايبه
......... وكن العُمر أوراق صفراء هزّت أغصانه يـديك

توّي بقول إن المدى مـُبصِر وكفـّي عايـبه
......... وأخيط فم الليل والعب لعـبة تجـيني أجيك !

أثر المواجه عشق وظروف المواجه نايبه
......... وما بينهن حلـم ٍ رسمك ولو تهيا له نسيك

تتوقعين اللي جرْحه الشوف عينه طايبه
......... دامه إلى ضم الهدب فوق الهدب ما يحتويك

شعاد لو صرت التمس عذرك وأنا اللي جايبه
......... أو أمحي وجَْودك وأخـلّي عرق فيني يرتجيك

الموت حق.. ويخـتلف صدقه : وكِلاٍ هايـبه
......... لوّك خذيتي سكرته مِـنـّي جبرته يفتديك !

سجّيت عن وجهي وأنا متأكد إنـّك غايبه
........ وردّيت له وآنا مشكك وأسألك إنتي هذيك .. !؟

صالح العبدالكريم
07-28-2010, 10:32 PM
احمدك يا ربي ولا يحمد على مكروه غيرك
................ واستغفرك عن ما ارتكبت من المعاصي والذنوب

انت الحليم اللي فلا شي ٍ يعجّلك ويثيرك
................. اظهرت حُسن بخلقتي واخلاقي واخفيت العيوب

وانت الرحيم اللي معاني رحمتك تخلف نذيرك
................... وانا اكثر عبادك يحبّك وانت علاّم الغيوب

قلت بكتابك من سجدلك نادم ٍ يبشر بخيرك
.................. وحرّمت عن نارك وجوه ٍ كل ما تخطي تتوب ..!

صالح العبدالكريم
07-28-2010, 10:34 PM
الإستذكار , وإن " التذكّر "
في هذه المرّه دلاله مستمدّه من أثر الأيام في الصاحب المحتمل ..
لا من أثر الأيام في شخصيته المحتمله ..!!

خصوصاً عندما يكون الوقوف على ممرات دفينه غير قابله للكسر
وهل يستطيع المرء أن يمنع حواسه من الترقـّب ..!
هو لوحده .. ليس له آخر عندما تختنق حرّياته
ويبدء يتحدث لملابسه ولأدواته ولسيارته .. فكُلُها غير ناطقه حتى :
" بـ لغة البسطاء.. والكاضمين الغيظ "

صالح العبدالكريم
07-28-2010, 10:35 PM
جتني عقب البعد واللي جالها
.......... من عذاب العشق تشكي حالها

ما تحسب ان الملامح انمحت
........... يوم جور البخت عنّي شالها

يوم ضاقت بالمحاجر دمعتي
.......... وايّست عيني بشوف آمالها

ارجعت تمشي على صدر السما
......... لين وجه الأرض حب ضلالها

جادل ٍ ما جت على وصف البشر
............ ترسم حـدود المدى بجلالها

قـد ما هي الفـتت بالي لها
............. قـد ماني لافـت ٍ لي بالها

من عرفت الليل وانسام السهر
......... كل طاري يمرّني يطرى لها

رغم حسنه ما رضت غيري بديل
........ ورغم وضعي ما رضيت بدالها

اجمعـتني بعـد ماني منـتثر
............ من فعـل دنياي وثقل احمالها

علّمتني كيف ترتيب الصبر
............ ليـن بعد الله بـديت الجا لها

كيف ابوصف من تعدّى وصفها
............. الخيال اللي نحـت تمثالها

طـيّبه لآخر مسافات الطُـهر
............. لو حداها عن مكاني فالها

واضحه ما تختلف فيها الظنون
............. كل شي ٍ لا بغت يصفى لها

واثقه من نفسها في نفسها
.............. وافيه للموت دون اقوالها

للبراءه في ملامحها طفل
............. وللأنوثه نضج من افعالها

تستزيد من الغلا حتى كسرت
............. حاجز الكِلفه بطيب خصالها

إن بغيت الجد ساقت جدها
............. وإن بغيت هبال جت بهبالها

صارت اقرب من عيوني لنّظر
.............. وين ما لـدّيت بان خِـيالها

ما اذكر انّه ازعلتني بالحكي
............. لو اجيب من الخطايا جزالها

جت تشيل البرد وتخمّ الحطب
.......... وجيت اشبّ هموم صدري بجالها

سوّد الله وجه عذّال الهوى
............... كانهم منـّو علي بوصالها

لكن الموعد تباشير اللقا
................. وكل نفس معلّقه بأفعالها

دامها لجلي تحدّت كل شي
............. والله لو تطلب حياتي فدا لها ..!

صالح العبدالكريم
07-28-2010, 10:35 PM
العام هذا زل
............ لكنّ وقعه عاش

ما بين صدقٍ مل
............ وما بين كذب اوباش

الوقت يصبح غل
............ لا صار وضعه ماش

برّق تشوف القل
............. ياللي تظن اهتاش

بالهرج أخذ وخل
............. وآخرها ربطة جاش

والدثوي اللي بل
.............. ريقه لجل يعتاش

عشّوه ملح وخل
............. وساقوه كيس عراش

قالو الخدين بحِل
............... قلت الخدين قماش

يمسح بوجهه ذل
............... صوره بدون فلاش

يا شاري حتّة ظل
............... بقيمة غطا وفراش

اخاف بكرا الكل
............... يدمن على الفشفاش

إن ولولولك ول
............... وإن قشقشوك قشاش

اضحك بعين وقل :
............... شوفو الحرامي انحاااااااااااش !!

صالح العبدالكريم
08-03-2010, 11:41 AM
للعشق معنى وطلاسم .. لو تطاوله الدموع
............. إنبتت وسط المحاجر .. لعنه / وضيم / وألم !!

يا حبيبي شحيلة اللّي راح .. والنيّه رجوع
............. يعني ذنبه يوم عزّم يبتسـم .... راح يحلم !

لا تـذكّرني بربك .... دامـنا صرنا نجـوع
............. للعبث ... قبل نتعلّم .... نبري ضلـوع القـلم ؟

صالح العبدالكريم
08-03-2010, 11:42 AM
الليله حسّك يا خفوقي عالي
تبقى رغم كل الحوادث عالي
والناس فيها اللي تحت والعالي
لا تامن احد وخل امانك بالله

O ~ O

يا كثر ما توقف وغيرك ماشي
وان قلت هونك قال نبضك ماشي
من الحقايق لو تفكّر ما شي :
يسوى تضيق وما يغيضك خلّه

O ~ O

راحت علي ايام مامن بينه
للي ترك ذكراه بيني وبينه
والنفس لوما اقتفاها بينه
ما قمت اطوي حاجتي ويفلّه

O ~ O

خلك كذا لا تلتفت للماضي
كم غرّتك دنيا تميض وماضي
ما قدّر المولى علينا ماضي
ذي سنة الله فـ الخلايق كلّه !!

صالح العبدالكريم
08-03-2010, 11:51 AM
ادري والله انّك حبيّب
بس هذا الوقت ماهو وقت
انت كيفك
وانشالله طيّب !؟

هذي كلمه مثلها مثل السلام
لو تمر بشارع الكل بيقوله
يعني ماله نكهة الماضي
ولا صدق الكلام !
ومن يحدد فيها قدره .. عند من حوله
يشيّب ...!؟

خذ نصيحه .. إن بغيته
ولاّ إرميها وروح
هذا وقت ان شفت نفسك تايه
أو راسك يفوح
مخطي لو سرّك حكيته
تعلّم انك تخفي عن نفسك .. بنفسك
او إذا وصّلت حدّك
فضفض لنفس الجروح !؟


لانها لا يمكن تطلّع سوالفك لأحد
او تضحك بوجهك
ومن خلفك تعيّب
وادري والله انّك حبيّب

صالح العبدالكريم
08-03-2010, 11:51 AM
للذكريات .. وخفيف الدَّم يا جدّه
................... شي ٍ يحد الخفوق ... وشيٍ آحدّه

لن الأماكن ابد ما عاد تاسعني
................. وانا عرفتك رخاء في تالي الشدّه !

ما كنّي إلاّ شبيهي يوم توديعك
.................. وما كنّك إلاّ انا .. واحسبها بالمدّه :

يومي أهز الضلوع والعن اشيائي
................ والصوت ياصل الين اقصاه وآردّه !

شوفيني حالف ازورك بالسنه مرّه
................ واقول واحشني بحرك .. تسألي شقدّه؟

واقول من دون قدّ .. وتنطق عيوني
................. قدّ الحنين ..وعتاب النفس ..والصدّه !

لاني بأول جريح ٍ ... يزهد بثاره
................. ولاني بآخر حبيب ٍ .... يكسره ودّه !

صالح العبدالكريم
08-03-2010, 11:52 AM
وش عاد له ازعل .. وانا ممتلي صبر

................. وش عاد له اشره .. وانا قافل الباب


عيب ٍ على مثلي ترى .. ومثلك يخبر

................. انّه يهز ّ رقبته .... إن هزّت أرقاب


تذبحني واسكت .. لا بعد تنتقي قبر

................. ودّك تأكد .. وش كرامات الأحباب !

صالح العبدالكريم
08-03-2010, 11:53 AM
ياللي على أدنى الأمور تأفف
................ امّا انك اهبل أو بطبعك آفه

ما كل كيال ٍ لزوم يطفف
................. يفرق بعضهم قولة الله عافه

ولا ينفع العينين دمع يكفف
.................. لا شفت ملحه نابت ٍ بـ اطرافه

ما قد سمعت بـ آدمي مجفف
................... لجل يتنفّس راح يلغي اوصافه

ما وقّف وناظر عساه يدفف
.................... وما مد رجله اطول من لحافه

وما قال شوفوني عشان يصفف :
.................... بعض الهموم اللي مداها تافه

يا لعنبو نفس ٍ بغير تعفف
.................... ويا لعنبو حكي ٍ كثير احلافه

واللي بخيص ٍ فـ الامور يخفف
................... شوفه قبل يستسخف اللي شافه !

صالح العبدالكريم
08-03-2010, 11:56 AM
قليله ان قلت لك حبّك حقيقه ما دخلها زيف

............... وقليله ان قلت لك دنياي بقربك طعمها ثاني



شعور اكبر من الواقع واذا تبغي تعرفي كيف

................ بقول : وقبل لا اقوله : ابجمع عقلي وجناني



شعوري اني مسكت الغيم بيدّي والليالي صيف

................ وقمت من العطش اشربه قبل لا يذوب بلساني !؟

صالح العبدالكريم
08-03-2010, 12:03 PM
لو ما عظيم الحب .. ما فار دمّي
....... ولو ما دليل الشوق .. ما جيتك اشكيك


لو منتي همّي .. منهو بالله همّي
......... وانا ضلوعي .. لا تمْـايلت .. تطريك


يا سدرة الشوق .. وتلاوين فمّي
........ يا شمعة ٍ يبطي البخت .. ما يطفـّيك


مرّات احسّك .. من براءتك .. امّي
........ واقول من كثر الغلا .. شلون اوفـّيك


الفرق : انّه.. من اوّل العمر.. يمّي
....... وانتي .. بآخر عمري ..اصبحت اناديك


هذي يديني .. بذمـّتك .. دوك شمّي
........ لا غبتي عنـّي .. اشمّها ريحة ايديك


اخاف بكرى..ان جيت باكل واسمّي
........ ياكل معاي العشق واخطي واسمّيك


وإن جاتك اشواقي تبعثرك.. لمـّي
........ كل الحنين اللي من البارحه فيك !!

صالح العبدالكريم
08-03-2010, 12:05 PM
هذا الأول .. من شهر شعبان .. بيّن
........ الله اعلم .. وش طويت .. بهالشهر !؟

انجبرت اكذب على نفسي .. بهيّن
......... وانا ادري : هيّن .. آخرها سهر

العشق ( في خافقي ).. رجّال ديّن
......... ما يهمّه .. لو يغـربـله .. الدهر

يعني لو يدري بسرّي وش يزيّن
........ اعرف انّه ضعيّف .. ومملي طهر

لو كتمته .. ما وطيت الدرب ليّن
......... ولو بقوله .. زادني قولي .. قهر !

عارف اني بحالتيني وش بعيّن
........ دامي شاعر .. من جروحه اشتهر !؟

صالح العبدالكريم
08-03-2010, 12:05 PM
ودّي اجي لك بالغلا .. كود اساليك

........ واعطيك قلبي .. وانشده ما بدالك !


تعبت اصارخ بسم الأشواق وادعيك

....... واسمع صدى صوتي من اقفاك هالك


تصعب علي نفسي اذا جبت طاريك

........ خايف من اللي طالني .. يكون طالك


ابيك تشكي لي همومك .. واواسيك

........ ما بيك تغليني .. متى ما حلالك !


ابي الى منّه قسى وقتي اطريك

........ وتنشد علي .. لا ضيّق الوقت بالك


تراك غالي ومابه احد ٍ يساويك

........ ولو الغلا ينساق .. سقت الغلا لك


خايف اجيك بلهفتي .. وما الاقيك

....... وتكسر ضلوع اللّي من الشوق جالك ..!!

صالح العبدالكريم
08-03-2010, 12:06 PM
الصباح اللي بلا صوتك .. يا عمري مو صباح

.......... شوفي حتى ان العصافير .. هجرت شمسه وفيـّه !




كل ضلع ٍ لا طريت اسمك .. تغافـلني وطاح

.......... كن ربي ما خلق بالكون .. لك غيري ضحيـّه .!؟

صالح العبدالكريم
08-03-2010, 12:06 PM
جايز تلاقي في وصالي لك .. بعد مدّه ألم

...... وجايز الاقي لك عذر .. واسكت واسامحك واروح !


لكن تأكد .. كل ليله يرسمك جفني حلم

...... واصحى وقلبي من حنينه .. يلفظ اسمك : وبوضوح .!؟

صالح العبدالكريم
08-03-2010, 12:08 PM
شدعوى يعني : يوم اشوفك .. تهدي بطانيّه

.......... اخاف ناوي .. تغطـّي اللي من هوانا.. بيّن



فكره ..؟ وكن الدنيا تصرخ .. فديت هالحنيّه

......... وانت اعلم الخلق .. بوجع قلب ٍ مداه حنيّن



يمر بالي الحين .. خطوه ما هي وحدانيّه

......... لا يغرّك .. انّي في كثير احوال : فكري ديّن



لا قلت لحدٍ يسمعك .. يمكن تزين النـيّه

.......... احس بعيونك تقول .. من الصلاح .. ايه هيّن !

صالح العبدالكريم
08-03-2010, 12:09 PM
ايوالله .. إنـّه كل ما حل طرياك

......... لجـّت ضلوعي وقتها .. ذا مكانك


وش للمشاعر .. غير ترديد حيّاك

.......... وش للمحبّه .. غير ضحكة ثمانك


يا ليتي ابقى .. لآخر العمر ويّاك

........... تاخذ دفا قلبي .. وانا آخذ حنانك !!

صالح العبدالكريم
08-03-2010, 12:09 PM
دايم تعذّب من خفوقه يحبّك

........... دايم تخلّي وجهه أسود من الصاج


حرام اجيك جروح تبخل بطبّك

........... حرام اجيك بشوق و تصدّني إحراج


يعني عشانك بحر واغليت غبّك

........... لابد تسقـيني .. من الغرقه أمواج !!

صالح العبدالكريم
08-03-2010, 12:12 PM
من علّم الغزلان .. لا ذاقت الطرد

................. ما تلتفت .... حتى ولو خافت تطيح !


الله خلقها دافيه .. إن خشها برد

.............. والله خلقها ناعمه .. إن خاوت الريح


والله خلق له .. وجنتينٍ من الورد

............. واليا مشت .. ينبت من اقدامها الشيح !


تتنفّس الصبح وعلى انفاسها يرد :

.............. قطر الندى / صوت العصافير .. وتّيح :


فرصه ... لمن يكرد مرابيعها كرد

................ لجل يترنّم ...... في قوام المماليح !


ما كنّها إلا سالفه .. تنسرد سرد

.............. ما له نهايه ..... والحنايا مراجيح


تشاغب احجار الفلا وتسفه النرد

............. وتزهى مثل : زهو المسا بالمصابيح !


ماهي بقولة بارها .. وأزهل الفرد

............. له بالحشا .. ما يملي الأرض تسبيح


لن الحقايق .. لو تسوّي لها جرد

............. كم فكرة ٍ تتجمّد .... وفكره تسيح !!

صالح العبدالكريم
08-03-2010, 12:18 PM
سيقينا الماي .!
ما خذنا من افم الوقِت غير : لعان
وشتيمه : أنجبت أوطان !
وك شبيها الضلوع تفور
وأرقاب الحمام تدور
ضنّك خافت إمن الجاي

أو تباوع بقايا سور
وجسمٍ طاح ..
حجي هوايا .. حجي بـ الكان !



منو يسأل عن الـصاير
بكت هالأرض ..
ورحل طاير ؟
وبقى صوت الدموع يدق
من اللي يسمْعه و عايش
من اللي ما انقتل حاير
خطيّة صدق
خطيّه الـ كل بيها أنهان ..!!!

صالح العبدالكريم
08-03-2010, 12:18 PM
ما أصدّق : إني ممكن افقـدك

..... تكفى طمّني .. وقل : ما فيني شي



غيرتك/ حبك/ حنانك/ موعدك

..... وإن طلبتك غـير ذا الاربـع فعي



لو بصدّق شي عني يبعدك

...... راح أصدّق بالحـياه وإني حي ..!

صالح العبدالكريم
08-07-2010, 01:56 PM
http://www.ayaade.com/vb/uploaded/4_01280941081.jpg





يا ربُّ عفوَك إننا ضعفاءُ
........... ولنا ببابك توبةٌ ودعاء ُ

فلقد وقفنا عند بيتِك نرتجي
........... فلنا بعفوِكَ منةٌ وعطاءُ

منّا الغنيُّ ومن يؤملُ غايةً
........ منّا الكسيرُ لفقرِهِ الفقراءُ

منّا الغريقُ بكل ذنب ٍ عابر ٍ
...... منّا المريضُ ودونَه ُ الحكماءُ

فلنا ضياؤك حين تهمي ظُلمةُ
........ ولنا جلالُك للقلوب سماءُ

رمضان أقبل كُل روح ٍ قد دنت
......... لتُطل بين بياضها الآلاء ُ

فنصومُ عن كل الذنوبِ ونرتجي
....... عفواً يظلله المدى الوضاء ُ

فاقبلْ إلهي من كثيركَ قِلَّنا
...... فلنا ذنوب ٌلا تُرى وجفاء ُ !!

صالح العبدالكريم
10-18-2010, 03:49 PM
صرت أخاف
إن القدر.. يـ اخ ـذك منّي

وأنا أدري بك ..
تموت ..
ولا تغيب

ودّي أبكي ..
ليييين ما ينثرك ظني
ودي أنسى ..
لين ما أشوفك قريب ..!

صالح العبدالكريم
10-18-2010, 03:54 PM
مع السلامه وإنتواجه على خير
........... يا الغالي اللي في خفوقي مكانك

تدري على كثر البطا والمشاوير
............. ودّي لو أقدر أسرقك من زمانك

إيه السما صدري وترنيمتك طير
............. يطير معها كل عمري بأمانك

إيه المطر دمعي وأنا دمعتي غير
............ ما طاحت إلاّ من غلاك وحنانك

دامك تغيب بينخلق لك معاذير
........... ما هو عشانك صادق إلاّ عشانك

واللي جمعني مع طيوفك على خير
........... محد ٍ يسد إليا مشيت بمكانك !

صالح العبدالكريم
10-22-2010, 10:37 PM
http://www.ayaade.com/vb/uploaded/4_11278692206.jpg




حبيبي لا نويت إنّك تشوف وخاطرك تعبان
............... تعلّم تجمع أهدابك قبل تسهى ويشقونك

تعبت وخاطري ماله ملامح والزمن نسيان
.............. وأقسى ما يمر أنك تمر وما يشوفونك

تأمل لكن أصحى لا تأملت بمدى الألوان
..............تجي في بالك الدنيا وتنسى من يحبونك

صالح العبدالكريم
02-22-2011, 08:02 PM
أنا ما جيت أسولف لك عن غياب السما والنور
...............أنا جيت أرسم الخطوه البعيده قبل تلقاني

فرشت الأرض بضلوعي خطاوي وأبنيه وقبور
............... قبل لا اتنفس الشيب وبعد ما صار يملاني

مشيت وما دريت إني تلبّست الشجر والدور
............... وقفت وما هقيت اللي ضحكت لأجله أبكاني

حبيبي ماني بقادر أغنّي وخاطري مكسور
.............. تعبت أعزف مواعيد الحنين وأجرح لساني

حبيبي والزمن ناقص ملامح والحكي مأثور
.............. وأنا ما عاد بي قدره أشيل الناس وأنساني

أنا لك يا رقيق القلب نظره وأمنيه وشعور
.............. رميت الهم و الدنيا وراي وجيت وحداني

بحبك لين أحس إن الليالي لا وقفت تدور
.............. وأموتك لين أحس إنك دعيت الله وأحياني

رحل مني الكثير أدري ولكن باقي الميسور
................ تعال وخذني الليله بحضنك وإترك الفاني

صالح العبدالكريم
04-13-2011, 04:59 AM
فجأه كذا من دون موعد أو حكي أو إهتمام
............... جيتي ويدّينك سما وباقيك من غيمه وفي

تمشين ما كن المطر وقّف بشباكك ونام
............ تحكين وأهدابك مدى واسع وترنيمة وضي

أعذب من الماء لا يبس حلق الليالي والكلام
........... ألطف من أحلام الصبا لا زادت أحلامه شوي

مو بس أحبك أنا أموت بحبك لحد الهيام
............ وأضيق من طاري السفر وأغار من نفسي علي

حتى الرياض اللي تلم الناس وتحب الزحام
............ في غيبتك صارت كئيبة وفاضية وماتسوى شي

صالح العبدالكريم
04-27-2011, 02:11 AM
قلّي
وش اللي صابنا
من علّم السُهد يتغندر في مطارحنا
وإليا صحينا عابنا
من علّم الثاني يتبسّم للسما
والدمع من صدره نزل
لا مضمضته أهدابنا

مِن منّا غنّا للحنين
لين أنزرد حلقه وجع
مِن منّا راح
ويا وجع قلب اللي راح إليا رجع
لا حس بإنه منكسر
للحب وصوت أحبابنا

لا صار ياكلنا الوله
لا صار ياكلنا الوله
ذكرى
بصوت أنيابنا ..!


تدري وش اللي أذكره هاللحظه
أذكر لحظتك
علّمتني
أمشي كثر ما أمشي
ما أوقّف وأخاف
وهذاني بعدك أجبن أهل الأرض
وضلوعي نحاف
علّمتني
بإن العشق له فم
بس ماله عيون
لو ننعمي
يزهى بنا
وهذاك رحت بكل شوفك
وأنا أضيّع بابنا ..!

علّمتني أشياء كثير
وعلّمتك تحب بضمير
والحين قلّي
ليه أنا أتنفّسك هاللحظه وأضيق
وأضم يديني على رجولي
وأعد أسبابنا ..

صالح العبدالكريم
04-27-2011, 03:37 AM
http://farm6.static.flickr.com/5189/5652428945_3f08b20913_b.jpg








تضحك كأن العُمر وقّف عند رغبتك ورجع
............. تضحك كأن اللي لمس تجعيد وجهك ما نسيك

تدري يا عم إن البراءة احيان تغمرك بوجع
................. تشبه كثير الدمعه اللي بغمرة أفراحك تجيك

مدري لمحت بشيبتك أحداث طاريها سجع
................. والا لمحت بغمضتك دنيا ، وماضيها يبيك !







شكراً لمصورة الحدث

صالح العبدالكريم
05-18-2011, 05:37 AM
عندما حدّثتك بأن الحياة لا تتطلب منّا كل هذه التفسيرات فأنا أعني ذلك ..
وعندما حدّثتك بأن الحنين لا يتطلب منّا أن نضع أمام قلوبنا إسفنج فأنا أعني ذلك ..
وعندما حدثتك بأن الواجبات و المبادئ والقيم والأخلاقيات وكل ما يمت لهذه المفردات بصله لا يعطينا الحق بأن نجعل من أي حدث ساقط أو مرتفع إنموذج نفصل من خلاله كيف للأشياء الصحيحه أن تكون كذلك .. فأنا أعني ذلك

جميل أن يكون كل شيء بالحياة جميل ولكن وبكل ما أعتقده من قول أن العاطفه رقيقه وحُق لها أن تكون كذلك ولكن العاطفه التي لا يستطيع المرء من خلالها الإمساك بمعتقداته وعُقده عاصفه لا يرى من خلالها شيء ولا يُرجى لمعتنقها الثبات على أرض والسماء أشق عليه من نعليه ..َ
فكن أحب المحبين إليك قبل أن تكون أكثر المتشائمين بك فالعاطفه آخر يسكننا ويتمثل بنا ، نحن نسير بكثير من الأشياء اللذيذه جداً متى ما شعرنا بذلك ومتى ما أردنا أن نتناولنا من خلالها .

صالح العبدالكريم
05-28-2011, 12:31 AM
لا يُختلف في ما حدث داخل بلدنا الحبيب حفظ الله علينا أمننا وغفر الله لمن مات وغفر الله لمن أصاب وغفر الله لمن أخطأ، كما لا يُختلف في أن الجهاد ضد الكفار المحاربين حق وصمود المُجاهد الحق حق .. وأن الأمر كله لله ! .



http://www.abjdeat.com/vb/imgcache1/071366f8cbeb74153a4a5dc739f636a1.jpg





بكائي لا يعيدك يا أسامة
................ فُديت ببندر ٍ وفدتك لامه

فحزني لا يغادر مقلتيَّ
................ وقلبي كاد يفجر ما أمامه

وإني أُشهد الدنيا وربي
................. وذل وقوفنا يوم القيامة

بأنك لو وصفت بكل قبح ٍ
................ فأنت وربنا رمز الكرامة

فيا طيب َ النهاية يا شهيداً
................ فقد شابهت فعل أبي قدامة

ويا أسفاهُ قد خنّاك قسراً
............... وأنت حفظت دينك والإمامة

جيوش الكفر والكفّار صفوا
............... فكانو ثعل ً إذ كنا نعامة

وكنت لوحدك السيف القوي
.............. تجوب الأرض زهداً وإبتسامة

فإن أخفوك في البحر إنتقاماً
.............. فقد زادوك يا شيخي شهامة

لإنك رغم موتك لم يزالوا
.............. يخافو بحَ صوتك والعمامة

صالح العبدالكريم
07-27-2011, 12:19 AM
الليلة أكثر ليلة أحتــآج قربي
كم لي وأنا محتآجني لكن آروح

من كنت آسولف لآخذآ الليل دربي
وأنا آسمع أنفآسي خطآوي ولا أبوح

لنّ الحنين إليآ خذآني كفـر بي
يـآقف على جآل المعآليق وينوح

ولنّ الوجع مآيرحم إليآ كثر بي
وأنآ أعرفه لآوسمّ بـ صدري يفوح

أخــآف أقول إن الوفآ مآغدر بي
وأخآف أقول إنه غدر بي ومسموح

الدمع صوت العين يـآمآ سهر بي
ويـآمآ توآعدنـآ على مفرق الروح

ويـآمآ تشحذّت المدى وقلت طر بي
طر بي ترى وجهي للأجناب مفضوح

مشتاق أشم أجساد الأحباب قربي
مشتاق أحفر قبورهم وأدفن جروح

أتعس ألم لآصرت بـ أكلي وشربي
أدمع وأحمد الله على الدمع وآروح

صالح العبدالكريم
10-25-2011, 02:36 AM
الأرق

إنك بعيد

وإني أمد من الغلا أضعاف ما قلبك سرق !

لا صار لأحساسي أصابع من حكي

ورموش عينك من ورق

لا صرت أتنفس غرق

صدرك وحضنك غيمتين

عطر

وعلى هيئة عرق ..!